இந்தியக் குடிமக்கள் எங்கு பாதிப்புக்குள்ளானாலும் அவர்களை மீட்க மத்திய அரசு நடவடிக்கை எடுத்து வருவதாகவும், திமுகவின் மேடைப்பேச்சாளர் போல் முதலமைச்சர் மு.க.ஸ்டாலின் பிரிவினை நாடகத்தை அரங்கேற்ற முயற்சிக்க வேண்டாம் எனவும் பாஜக மாநிலத் தலைவர் அண்ணாமலை தெரிவித்துள்ளார்.
தமிழக மீனவர்கள் இலங்கை கடற்படையினரால் கைது செய்யப்பட்டுள்ள நிலையில், அவர்களை விடுவிக்க வேண்டுமென தமிழக முதலமைச்சர் மு.க.ஸ்டாலின் வெளியுறவுத் துறை அமைச்சருக்கு கடிதம் எழுதியிருந்தார்.
இவர்கள் தமிழ்நாட்டு மீனவர்கள் மட்டுமல்ல; இந்திய மீனவர்கள் எனவும் முதலமைச்சர் மு.க.ஸ்டாலின் கூறியிருந்தார்.
இதற்கு பதிலளிக்கும் விதமாக அண்ணாமலை வெளியிட்டுள்ள எக்ஸ் பதிவில், தமிழகத்தைச் சேர்ந்த மீனவ சமுதாய மக்கள், இலங்கை கடற்படையால் பாதிப்புக்குள்ளாவதற்கு திமுகவும், காங்கிரஸும் கச்சத்தீவை தாரை வார்த்தது தான் காரணம் என கூறியுள்ளார்.
மீனவர்களை வஞ்சித்த திமுக, தற்போது மீனவர் நலன் என்று நாடகமாடுகிறது என்பது மீனவ சமுதாய மக்களுக்கு நன்றாகவே தெரியும் என்றும் அண்ணாமலை கூறியுள்ளார்.
இந்தியக் குடிமக்கள் எங்குப் பாதிப்புக்குள்ளானாலும் அவர்களை மீட்கும் பணியை மத்திய அரசு துரிதமாக மேற்கொண்டு வருவதாகவும் அண்ணாமலை கூறியுள்ளார்.
தமிழன், இந்தியன் என்று திமுகவின் மேடைப் பேச்சாளர்கள் போல, பிரிவினை நாடகத்தை அரங்கேற்ற முதலமைச்சர் மு.க.ஸ்டாலின் முயற்சிக்க வேண்டாம் என்றும், அவர் வகிக்கும் மாநில முதலமைச்சர் பதவிக்கு அது அழகல்ல என்றும் அண்ணாமலை தெரிவித்துள்ளார்.
