கொல்கத்தாவில் பாலியல் ரீதியாக துன்புறுத்தப்பட்டு கொலை செய்யப்பட்ட பெண் மருத்துவர் விவகாரத்தில் கருத்து தெரிவித்த அவரது தந்தை, தனக்கு மம்தா பானர்ஜி அரசு மீது நம்பிக்கையில்லை என தெரிவித்துள்ளார்.
பெண் மருத்துவர் பாலியல் வழக்கை சிபிஐ விசாரித்து வரும் நிலையில், வடக்கு பர்கானாவில் செய்தியாளர்களிடம் பேசிய அவரது தந்தை, விசாரணையிலிருந்து தங்களுக்கு இன்னும் தெளிவான முடிவு ஏதும் கிடைக்கவில்லை என தெரிவித்தார்.
மேலும், மருத்துவமனை தரப்பில் தங்களுக்கு யாரும் ஒத்துழைப்பு கொடுக்கவில்லை என்று கூறிய அவர், இந்தக் கொலைக்குப் பின்னால் ஒட்டுமொத்த அரசுத் துறையும் ஈடுபட்டிருக்கலாம் என சந்தேகம் தெரிவித்தார்.
இடுகாட்டில் மூன்று சடலங்கள் இருந்த நிலையில், தனது மகளின் சடலம் அவசர கதியில் முதலாவதாக எரியூட்டப்பட்டதாகவும், நீதி நிலைநாட்டப்படும் என கூறும் மம்தா பானர்ஜி அரசானது, நீதிக்காக போராடுபவர்களை சிறையில் தள்ளி கொடுமைப்படுத்துவதாகவும் பெண் மருத்துவரின் தந்தை வேதனை தெரிவித்தார்.
மேலும் மம்தா பானர்ஜி மீது தனக்கு நம்பிக்கையில்லை என்று கூறிய அவர், மேற்கு வங்க அரசு அளிக்கும் நிவாரணத்தை ஏற்றுக்கொள்ள மாட்டோம் என திட்டவட்டமாக தெரிவித்துள்ளார்.
