NPS வாத்சால்யா திட்டத்துக்கான இணையத் தளத்தை மத்திய நிதியமைச்சர் நிர்மலா சீதாராமன் தொடங்கி வைத்துள்ளார். மேலும், புதியதாக பதிவு செய்யப்படும் குழந்தைகளுக்கு நிரந்தர ஓய்வூதிய கணக்கு எண் கொண்ட PRAN அட்டைகளையும் வழங்கியுள்ளார். இந்தியாவின் ஓய்வூதிய அமைப்பில் குறிப்பிடத்தக்க முன்னேற்றத்தை ஏற்படுத்தி இருக்கும் NPS வாத்சால்யா திட்டத்தைப் பற்றி இந்த செய்தி தொகுப்பில் பார்க்கலாம்.
குழந்தைகளுக்கான பெற்றோர் மற்றும் பாதுகாவலர்களின் பங்களிப்புடன்
NPS வாத்சால்யா திட்டம் அறிமுகப்படுத்தப்படும் என்றும், 18 வயது ஆனவுடன் திட்டத்தை தடையின்றி வழக்கமான தேசிய ஓய்வூதிய கணக்காக மாற்றலாம் என்றும், கடந்த ஜூலை மாதம், நிதிநிலை அறிக்கையில், மத்திய நிதியமைச்சர் அறிவித்திருந்தார்.
அதன்படி, நாடு முழுவதும், இந்த திட்டத்தைத் தொடங்கி வைத்த மத்திய நிதி அமைச்சர், அதற்கான பிரத்யேக இணையத் தளத்தைத் தொடங்கி வைத்துள்ளார்.
குழந்தைகளின் நிதி எதிர்காலத்தை பாதுகாப்பதற்காக ஆரம்பத்திலேயே, முதலீடு செய்யத் தொடங்குவதை நோக்கமாகக் கொண்டுள்ள NPS வாத்சால்யா திட்டத்தை, ஓய்வூதிய நிதி ஒழுங்குமுறை மற்றும் மேம்பாட்டு ஆணையம் நிர்வகிக்கும் என்று கூறப்பட்டுள்ளது.
NPS வாத்சல்யா மூலம் ஓய்வூதியக் கணக்கில் முதலீடு செய்வதன் மூலம் பெற்றோர்கள் தங்கள் குழந்தைகளின் எதிர்காலத்திற்காகச் சேமிக்க முடியும் என்றும், NPS வாத்சல்யாவின் கீழ்,
குறைந்தபட்ச பங்களிப்பு ஆண்டுக்கு 1000 ரூபாயாக இருக்கலாம் என்றும், அதிகபட்ச பங்களிப்புக்கு வரம்பு இல்லை என்றும் கூறப்பட்டுள்ளது. பொருளாதார ரீதியாக பின்தங்கிய குடும்பங்களுக்கும் ஏற்றதாக இருக்கும் இந்தத் திட்டத்தில் கூட்டு வட்டி கிடைக்கும் என்று தெரிவிக்கப் பட்டுள்ளது.
NPS வாத்சல்யா திட்டத்தில் சேமிக்கப்படும் தொகையை, கணக்கு தொடங்கியதில் இருந்து 3 ஆண்டுகள் வரை திரும்பப் பெற முடியாது என்றும், மூன்று ஆண்டுகளுக்குப் பின் கல்வி, குறிப்பிட்ட நோய் காரணங்களுக்காக மட்டும் 25 சதவீத வரை திரும்ப பெறலாம் என்றும், அதிகபட்சமாக மூன்று முறை இந்த காரணங்களுக்காக பணத்தைத் திரும்பப் பெறுவதற்கும் இத்திட்டத்தில் அனுமதி அளிக்கப் பட்டுள்ளது.
இந்த திட்டத்தின் கீழ் முதலீடு 2.5 லட்சம் ரூபாய்க்கும் மேலிருந்தால் அவற்றில் 80 சதவீதம் ஓய்வூதிய தொகுப்பு நிதியாக வைத்தது போக , மீதமுள்ள 20 சதவீதத்தை திரும்பப் பெற்றுக் கொள்ளலாம் என்றும், 2.5 லட்சம் ரூபாய்க்கும் குறைவாக இருந்தால், மொத்தப் பணத்தையும் திரும்பப் பெற்றுக் கொள்ளலாம் என்றும் இத்திட்டத்தில் தெரிவிக்கப்பட்டுள்ளது.
NPS வாத்சல்யா கணக்கில் சேரும் தொகையை, எதில் முதலீடு செய்ய அனுமதிக்கலாம் என்பதையும் பெற்றோர் அல்லது பாதுகாவலர் தேர்வு செய்ய அனுமதி அளிக்கப் பட்டுள்ளது. அதில், பங்குசந்தையில் 75 சதவீதமும், லைப் சைக்கிள் பண்ட்டில் 25 சதவீதமும், அல்லது
பங்குசந்தையில் 25 சதவீதமும், லைப் சைக்கிள் பண்ட்டில் 75 சதவீதமும் முதலீடு செய்யப்படும் என்றும் கூறப்பட்டுள்ளது. முதலீடு தேர்வு செய்யாதவர்களுக்கு , மாடரேட் லைப் சைக்கிள் பண்ட் என்ற பெயரில் 50 சதவீத தொகை பங்குச் சந்தை முதலீடாக தேர்வு செய்யப்படும் என்றும் தெரிவிக்கப் பட்டுள்ளது.
ஒருவேளை மரணம் நேர்ந்தால் , கணக்கில் சேர்ந்துள்ள தொகை முழுவதும் பெற்றோர் அல்லது பாதுகாவலருக்கு வழங்கப் படும் என தெரிவித்துள்ளது. இந்தியாவில் 18 வயதுக்கு குறைந்த பான் அட்டை உள்ளவர்களும், வெளிநாட்டில் வாழும் இந்தியர்களின் குழந்தைகளும் இந்த NPS வாத்சல்யா திட்டத்தில் சேரலாம்.
NPS வாத்சல்யா கணக்குத் தொடங்குவதற்கு, சிறுவர் சிறுமியரின் பான் அட்டை, பிறப்புச் சான்றிதழ் மற்றும் பெற்றோர் அல்லது பாதுகாவலரின் KYC ஆவணங்கள் சமர்பிக்கப்படவேண்டும். NPS வாத்சல்யா கணக்கை முக்கிய அரசு வங்கிகள்,அஞ்சல் நிலையங்கள், e-NPS இணையதளம் மூலம் தொடங்கலாம்.
இந்தியாவின் ஒவ்வொரு குழந்தையின் பாதுகாப்பான எதிர்காலத்திற்காக பிரதமர் மோடி தலைமையிலான மத்திய அரசு கொண்டு வந்திருக்கும் இந்த NPS வாத்சல்யா திட்டம்,சிறு வயதிலிருந்தே முதலீட்டுத் தேர்வுகளும் மற்றும் வலுவான நிதிநிலையையும் உறுதிப்படுத்த உதவுகிறது.
