நாமக்கல் மாவட்டம் ராசிபுரம் அருகே போதமலைக்கு சாலை அமைக்கும் பணி 60 சதவீதமே முடிந்த நிலையில், முதலமைச்சர் ஸ்டாலின் அவசர அவசரமாக திறந்து வைத்திருப்பதாகக் குற்றச்சாட்டு எழுந்துள்ளது.
ராசிபுரம் அடுத்த போதமலையில், கெடமலை, கீழூர், மேலூர் என மூன்று கிராமங்கள் உள்ளன. மலைவாழ் மக்களின் பல ஆண்டுகால கோரிக்கையை நிறைவேற்றும் விதமாக போதமலையில் சாலைப் பணிகள் நடைபெற்று வருகின்றன.
தற்போது சாலைப் பணிகள் 60 சதவீதம் முடிந்த நிலையில், 40 சதவீத பணிகள் எஞ்சியுள்ளன. இந்த சூழலில் பணிகளே முடியாத போதமலை சாலையை முதலமைச்சர் ஸ்டாலின் காணொலி மூலம் திறந்து வைத்திருப்பது மக்களிடையே கடும் அதிருப்தியை ஏற்படுத்தியுள்ளது.
தேர்தல் நெருங்குவதாலும், கல்வெட்டில் பெயர் இடம்பெற வேண்டும் என்ற நோக்கத்தோடும், திமுக அரசு அவசர கதியில் சாலையை திறந்து வைத்திருப்பதாக அப்பகுதி மக்கள் குற்றம்சாட்டியுள்ளனர்.
