நாடு முழுவதும் தீவிரமாகச் செயல்பட்டு வரும் பாரதிய ஜனதா மஜ்தூர் செல், தனது புதிய கிளையை தமிழகத்தில் தொடங்கியுள்ளதாக மாநிலத் தலைவர் அருள் குமரன் தெரிவித்துள்ளார்.
செங்கல்பட்டு மாவட்டம், கூடுவாஞ்சேரி அருகே உள்ள தனியார் திருமண மண்டபத்தில் பாஜகவின் தொழிலாளர்கள் அமைப்பான பாரதிய ஜனதா மஜ்தூர் செல் பிரிவின் புதிய நிர்வாகிகள் பதவியேற்பு விழா நடைபெற்றது. இதில், அந்த அமைப்பின் தேசியத் துணைத் தலைவர் மூனாவரி பேகம் முன்னிலையில் நடைபெற்ற நிகழ்ச்சியில், மாநிலத் தலைவர் அருள் குமரன் உள்ளிட்ட முக்கிய நிர்வாகிகள் கலந்து கொண்டனர்.
பின்னர் செய்தியாளர்களிடம் பேசிய மாநிலத் தலைவர் அருள் குமரன், தமிழக தொழிலாளர்களின் பல்வேறு கோரிக்கைகள் மற்றும் பிரச்னைகளுக்கு விரைவாக தீர்வு காண்பதே பாரதிய ஜனதா மஜ்தூர் செல் அமைப்பின் முக்கிய நோக்கம் என தெரிவித்தார்.
மத்திய அரசின் தொழிலாளர் நலத்திட்டங்கள், மருத்துவக் காப்பீடு, கல்வி ஊக்கத்தொகை உள்ளிட்ட சலுகைகள் அனைத்து தொழிலாளர்களுக்கும் சென்றடைய நடவடிக்கை எடுக்கப்படும் என்றும் கூறினார்.
மேலும், புலம்பெயர் தொழிலாளர்களின் அடிப்படை தேவைகள் மற்றும் தனியார் நிறுவனங்களில் நிலவும் தொழிலாளர் பிரச்னைகளுக்கும் தீர்வு காண முயற்சிகள் மேற்கொள்ளப்படும் என தெரிவித்தார்.
