திருப்பதி ஏழுமலையான் கோயில் பிரம்மோற்சவத்தை ஒட்டி நடைபெற்ற தேரோட்டத்தில் ஏராளமான பக்தர்கள் கலந்து கொண்டு சாமி தரிசனம் செய்தனர்.
திருப்பதி ஏழுமலையான் கோயிலில் வருடாந்திர பிரம்மோற்சவ விழா கோலாகலமாக நடைபெற்று வருகிறது. தினமும் காலை மற்றும் மாலையில் பல்வேறு வாகனங்களில் மலையப்ப சுவாமி வீதி உலா வந்து பக்தர்களுக்கு அருள்பாலித்து வருகிறார்.
இந்நிலையில், பிரம்மோற்சவத்தின் எட்டாவது நாள் காலை உற்சவத்தில் ஸ்ரீதேவி, பூதேவி சமேதராக தேரில் மலையப்ப சுவாமி எழுந்தருளி பக்தர்களுக்கு காட்சியளித்தார்.
நான்கு மாட வீதிகளில் திரண்டிருந்த ஏராளமான பக்தர்கள் கோவிந்தா… கோவிந்தா… என கோஷம் எழுப்பி தேரை வடம்பிடித்து இழுத்தனர். ரத உற்சவத்தையொட்டி பல்வேறு மாநிலங்களை சேர்ந்த பக்தர்களின் கலை நிகழ்ச்சிகளும் நடைபெற்றன.
