இஸ்லாமிய மதத்துக்கு மாறிய இந்துக்களுக்கு BC சான்றிதழ் வழங்கக் கூடாது என்ற சென்னை உயர்நீதிமன்றத்தின் உத்தரவை உச்சநீதிமன்றம் உறுதி செய்துள்ளது.
தூத்துக்குடியைச் சேர்ந்த பரமசிவம் என்பவர் 2015-ஆம் ஆண்டு இஸ்லாமிய மதத்துக்கு மாறி, தனது பெயரை சமீர் அகமது என மாற்றிக்கொண்டார்.
இதனை தொடர்ந்து, ‘முஸ்லிம் லெப்பை’ சாதிச் சான்றிதழ் கோரிய விண்ணப்பம் நிராகரிக்கப்பட்டதால் உயர்நீதிமன்றத்தை நாடினார்.
இந்த வழக்கில், தமிழக அரசு 2024-ஆம் ஆண்டு பிறப்பித்த அரசாணையை ரத்து செய்த உயர்நீதிமன்றம்,
மதம் மாறியவர்களுக்கு BC சான்றிதழ் வழங்க முடியாது என உத்தரவிட்டது.
உயர்நீதிமன்றத்தின் உத்தரவை எதிர்த்து தமிழக அரசு உச்சநீதிமன்றத்தில் மேல்முறையீடு செய்தது.
இந்த மனு உச்சநீதிமன்ற நீதிபதிகள் பிரசாந்த் குமார் மிஸ்ரா மற்றும் ஸ்ரீ சந்திரசேகர் அமர்வில் விசாரணைக்கு வந்தது.
அப்போது அரசு தரப்பில், சமூக ரீதியாகவும் கல்வி ரீதியாகவும் பின்தங்கியவர்கள் மதம் மாறியதால் இடஒதுக்கீட்டுப் பலன்களை இழக்கக் கூடாது என்பதே அரசாணையின் நோக்கம் என வாதிடப்பட்டது.
மேலும், தமிழக அரசின் அரசாணை என்பது மத அடிப்படையிலான சலுகையோ, விலக்கலோ அல்ல என்றும்,
பின்தங்கிய வகுப்பினர் என்ற தனித்துவமாக வகைப்படுத்துவதற்கானது மட்டுமே எனவும் தெரிவிக்கப்பட்டது.
தமிழக அரசின் வாதத்தை பதிவு செய்து கொண்ட நீதிபதிகள், இஸ்லாமிய மதத்துக்கு மாறியவர்களுக்கு ‘பிற்படுத்தப்பட்ட முஸ்லிம்’ சாதிச் சான்றிதழ் வழங்கக் கூடாது என்ற சென்னை உயர்நீதிமன்றத்தின் உத்தரவை உறுதி செய்து உத்தரவிட்டனர்.
மேலும், உயர்நீதிமன்ற உத்தரவை எதிர்த்து தமிழக அரசு தாக்கல் செய்த மேல்முறையீட்டு மனுவை தள்ளுபடி செய்து நீதிபதிகள் ஆணையிட்டனர்.
