அரசுப் பேருந்தின் டிஜிட்டல் ரூட் போர்டில் சர்ச்சை வாசகங்கள் இடம்பெற்ற விவகாரம் தொடர்பாக 5 பேர் மீது ஒழுங்கு நடவடிக்கை எடுக்கப்பட்டுள்ளதாக விழுப்புரம் கோட்ட மேலாண் இயக்குநர் ஸ்ரீதரன் தெரிவித்துள்ளார்.
கடந்த 13ஆம் தேதி திருச்சியில் இருந்து நெய்வேலிக்கு சென்று கொண்டிருந்த அரசுப் பேருந்தின் பின்பக்க டிஜிட்டல் ரூட் போர்டில் சர்ச்சைக்குரிய வாசகங்கள் ஒளிர்ந்தன.
இந்த வீடியோ வைரலான நிலையில், சம்பந்தப்பட்டவர்கள் மீது ஒழுங்கு நடவடிக்கை எடுக்கப்பட்டுள்ளதாக விழுப்புரம் கோட்ட மேலாண் இயக்குநர் ஸ்ரீதரன் தெரிவித்துள்ளார்.
சம்பவ நாளில், அரசுப் பேருந்தில் பணியில் இருந்த ஓட்டுநர்கள் சித்திரைச் செல்வன், பரந்தாமன், நடத்துநர்கள் செந்தாமரைக்கண்ணன், வெங்கடேசன், மணிகண்டன் ஆகிய ஐந்து பேர் மீது ஒழுங்கு நடவடிக்கை எடுக்கப்பட்டுள்ளதாக தெரிவித்துள்ளார்.
மேலும், இதுபோன்ற செயல்கள் ஏற்படாத வண்ணம் விழுப்புரம் கோட்டம் முழுவதும் எச்சரிக்கை சுற்றறிக்கை அனுப்பப்பட்டு தீவிரமாக கண்காணிக்கப்பட்டு வருவதாகவும் குறிப்பிட்டுள்ளார்.
