ஈரோட்டில், தீபாவளி பண்டிகையின் மறுநாளை முன்னிட்டு ஜவுளிக்கடைகளில் 50 சதவீத தள்ளுபடி விலையில் துணிகள் விற்பனை செய்யப்பட்டதால், பொதுமக்கள் அதிகாலை முதலே நீண்ட வரிசையில் காத்திருந்து புத்தாடைகளை வாங்கிச் சென்றனர்.
ஈரோடு மாநகரின் மணிக்கூண்டு மற்றும் கடைவீதி பகுதிகளில் உள்ள ஜவுளிக்கடைகளில் தள்ளுபடி விற்பனை குறித்த அறிவிப்பு பலகைகள் வைக்கப்பட்டிருந்தன.
இதையடுத்து, அதிகாலை 3 மணி முதலே பொதுமக்கள் கடைகளில் குவியத் தொடங்கினர். கோவை, கள்ளிவாளையம், அரச்சலூர் உள்ளிட்ட பகுதிகள் மட்டுமின்றி, வெளி மாவட்டங்களில் இருந்தும் ஏராளமானோர் வந்ததால் கடைவீதி மக்கள் கூட்டத்தால் களைகட்டியது.
கூட்டம் அதிகரித்ததால் நீண்ட வரிசையில் காத்திருந்த மக்கள், தங்களுக்குப் பிடித்த புத்தாடைகளை ஆர்வத்துடன் வாங்கிச் சென்றனர். தீபாவளி மறுநாளிலும் புத்தாடைகள் வாங்க பொதுமக்கள் திரண்டதால், ஈரோடு ஜவுளிக்கடைகள் திருவிழாக்கோலம் பூண்டது.
