சிவகங்கை மாவட்டத்தில் தனியார் பேருந்து சேவை பாதிக்காத வகையில், ‘வெற்றிப் பயணம்’ பேருந்துகளின் கால நிர்ணயத்தை மாற்றி அமைக்க வேண்டும் என தனியார் பேருந்து உரிமையாளர்கள் தமிழக முதலமைச்சருக்கு கோரிக்கை விடுத்துள்ளனர்.
சிவகங்கை பேருந்து நிலையத்தில் செய்தியாளர்களிடம் பேசிய தனியார் பேருந்து உரிமையாளர்கள், பெண்களுக்கு இலவச பேருந்து சேவை வழங்கும் அரசின் திட்டத்திற்கு தாங்கள் எதிர்ப்பு தெரிவிக்கவில்லை என தெரிவித்தனர்.
ஆனால், ‘வெற்றி பயணம்’ பேருந்துகளால் தனியார் பேருந்துகளில் பயணிகள் வரத்து குறைந்து, வருவாய் பாதிக்கப்பட்டுள்ளதாக கூறினர். மாவட்டத்தில் 90-க்கும் மேற்பட்ட தனியார் பேருந்துகள் இயக்கப்பட்டு வரும் நிலையில், ஓட்டுநர், நடத்துநர் உள்ளிட்டோரின் வாழ்வாதாரமும் கேள்விக்குறியாகியுள்ளதாக தெரிவித்தனர்.
எனவே, ‘வெற்றி பயணம்’ திட்டம் குறித்து அரசு கள ஆய்வு நடத்தி, தனியார் பேருந்து சேவை பாதிக்காத வகையில் பேருந்துகளின் கால நிர்ணயத்தை மாற்றி அமைக்க வேண்டும் என வலியுறுத்தினர்.
