அரசு மருத்துவமனைகளில் பிறக்கும் குழந்தைகளுக்கான தாய்மாமன் தங்க மோதிரம் திட்டத்திற்கான நிபந்தனைகள் தளர்த்தப்பட்டுள்ளன.
தமிழகத்தில் அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் இந்தத் திட்டம், கடந்த செப்டம்பர் 28-ஆம் தேதி முதலமைச்சரால் தொடங்கி வைக்கப்பட்டது.
ஆரம்பத்தில் தமிழ்நாட்டில் நிரந்தரமாக வசிக்கும் தாய்மார்கள் மட்டுமே இத்திட்டத்தின் கீழ் பயனடைய முடியும் என அறிவிக்கப்பட்டிருந்தது.
இந்நிலையில், திருமணமாகி வெளிமாநிலங்களில் வசித்து வரும் பெண்கள் பிரசவத்திற்காக தமிழகத்திற்கு வரும்போது எழும் நடைமுறைச் சிக்கல்களைக் கருத்தில் கொண்டு அரசு தளர்வுகளை அறிவித்துள்ளது.
அதன்படி, வெளிமாநிலங்களில் வசிக்கும் தமிழகத்தைச் சேர்ந்த பெண்கள், தாய் வீட்டிற்கு வந்து அரசு மருத்துவமனைகளில் குழந்தை பெற்றால் தங்க மோதிரம் வழங்கப்படும் எனவும்,
திருமணமாகி வெளிமாநிலம் சென்ற பெண்ணாக இருந்தாலும் அவரின் பெற்றோர் தமிழ்நாட்டில் வசிப்பதற்கான ஆதாரங்கள் சமர்ப்பிக்கப்பட்டால் இத்திட்டத்தில் பயனடையலாம் எனவும் தெரிவிக்கப்பட்டுள்ளது.
