கடந்த ஜூலை 20 ம் தேதி இரண்டு நாள் அரசு முறை சுற்றுப்பயணமாக இந்தியா வந்த இலங்கை அதிபர் ரணில் விக்கிரம சிங்கே பிரதமர் நரேந்திர மோடியைச் சந்தித்து இருநாட்டு உறவுகள் குறித்து பேசினார். இதனையடுத்து கொழும்பில் நேற்று அனைத்து கட்சிக் கூட்டத்தைக் கூட்டினார். இந்தக் கூட்டத்தில் ஜேவிபி தவிர பெரும்பாலான கட்சிகள் பங்கேற்றன.
இலங்கை அனைத்து கட்சிக் கூட்டத்தில் ரணில் விக்கிரம சிங்கே பேசியதாவது;
போலீஸ் அதிகாரம் தவிர எஞ்சிய அனைத்து அதிகாரங்களையும் மாகாண சபைகளுக்கு கொடுக்க முடியும், இது தொடர்பாக அமைச்சரவையில் என்னுடைய தீர்வு திட்டம் முன்வைக்கப்பட்டுள்ளது.
13-வது அரசியல் சட்ட திருத்தத்தை நடைமுறைப்படுத்த தமிழ் அரசியல் கட்சிகளுடன் மட்டும் பேச்சுவார்த்தை நடத்துவது போதுமானது அல்ல. அனைத்து தரப்பு கட்சிகளுடன் பேச்சுவார்த்தை நடத்தி விவாதிக்க வேண்டியதும் அவசியமாகும். இலங்கையின் மாகாண சபைகள் முழுமையாக செயல்பட முழுமையான அதிகாரங்கள் வழங்கப்பட வேண்டும்.
இலங்கையின் 9 மாகாண சபைகளில், சிங்கள மக்கள் பெரும்பான்மையினராக 7 சபைகளில் உள்ளனர். 2 சபைகளில் தமிழர்கள் பெரும்பான்மையாக உள்ளனர்.. மாகாண சபை முறை தொடர்ந்து நீடிக்க வேண்டுமானால் தற்போதைய குறைபாடுகள் அனைத்தும் சரி செய்யப்பட வேண்டும்.
13-வது திருத்தம் என்பது தமிழர் பெரும்பான்மையினராக வசிக்கும் மாகாண சபைகள் தொடர்பானது மட்டும் அல்ல. ஒட்டுமொத்த இலங்கைக்கும் பொருந்தக் கூடியது. ஆகவே இலங்கையின் அனைத்து தரப்பினருடன் இதுகுறித்து விவாதிக்கப்பட வேண்டும் என இலங்கை அதிபர் ரணில் விக்கிரம சிங்கே கூறினார்.
