அமெரிக்காவின் ஹவாய் மாகாணத்திலுள்ள மாவி தீவில் காட்டுத் தீ ஏற்பட்ட பகுதிகளில் 385 பேர் காணவில்லை என்று அதிகாரிகள் தெரிவித்துள்ளனர்.
இது குறித்து காவல்துறை வெளியிட்டுள்ள அறிக்கையில், மாவி தீவில் காட்டுத் தீயால் பாதிக்கப்பட்டுள்ள லஹேனா மற்றும் மத்தியப் பகுதிகளில் காணாமல் போனதாக 388 நபர்களின் பெயர்கள் கடந்த வாரம் வெளியிடப்பட்டது.
எனினும், அந்தப் பட்டியலிலிருந்த 245 பேர் இருக்கும் இடம் கண்டறியப்பட்டு, பட்டியலிலிருந்து அவர்கள் பெயர்கள் நீக்கப்பட்டுள்ளன.
எனினும், ஏறத்தாழ அதே எண்ணிக்கையில் உள்ளவர்கள் காட்டுத் தீ சம்பவத்துக்குப் பிறகு காணவில்லை என்ற புதிய தகவல் கிடைத்ததால் அவர்களது பெயர்கள் காணாமல் போனவர்கள் பட்டியலில் புதிதாகச் சேர்க்கப்பட்டுள்ளன.
மாவி காட்டுத் தீயில் மாயமானவர்களின் எண்ணிக்கை தற்போது 385-ஆக உள்ளது என்று காவல்துறையினரின் அறிக்கையில் குறிப்பிடப்பட்டுள்ளது.
அமெரிக்காவின் ஹாவாய் மாகாணம், மாவி தீவில் கடந்த மாதம் திடீரென காட்டுத் தீ மிக வேகமாகப் பரவியது. இதில், 114-க்கும் மேற்பட்டவர்கள் உயிரிழந்தனர்.
மேலும், புகழ் பெற்ற வரலாற்றுச் சிறப்பு மிக்க சுற்றுலாத் தலமான லஹேனா நகரம் உள்ளிட்ட பகுதிகள் பாதிக்கப்பட்டுள்ளன. அப்பகுதியில் வசிக்கும் மக்கள் பாதுகாப்பு இடங்களில் தங்கவைக்கப்பட்டுள்ளனர்.
