நீலகிரி மாவட்டத்தில், கடந்த சில மாதங்களில் மட்டும் 6 புலிகள் மர்மமான முறையில் இறந்துள்ளது. எனவே, புலிகள் பலியாவதைத் தடுக்க தமிழக அரசு உடனே முன்வரவேண்டும் என வன ஆர்வலர்கள் கோரிக்கை விடுத்துள்ளனர்.
ஊட்டி தெற்கு வனச்சரகத்துக்கு உட்பட்ட எமரால்டு நேருநகர் பாலம் அருகே அவலாஞ்சி அணை உபரி நீர் வாய்க்கால் அருகே 2 புலிகள் மர்மமான முறையில் இறந்து கிடந்தது. இது தொடர்பாக எம்ரால்டு வனப்பணியாளர்கள் வனத்துறையினருக்குத் தகவல் தெரிவித்தனர்.
இதைத்தொடர்ந்து, நீலகிரி ஊட்டி வன கோட்ட மாவட்ட வன அலுவலர் கவுதம் சம்பவ இடத்திற்குச் சென்று விசாரணை நடத்தினார். அப்போது அங்கு ஒரு புலி தண்ணீருக்குள் மூழ்கிய நிலையில் இறந்து கிடந்தது. மற்றொரு புலி நீரோடைக்கரையில் சடலமாகக் கிடந்தது. அவற்றை வனத்துறையினர் மீட்டு ஆய்வு செய்தபோது, அதில் ஒரு புலி பெண் புலி என்பதும், அதன் உடம்பில் காயங்கள் எதுவும் இல்லை என்றும் தெரிய வந்தது. இதனால், அவை ஒன்றுக்கொன்று சண்டையிட்டுப் பலியாகவில்லை எனத் தெரிய வந்தது.
இதனைத் தொடர்ந்து, 3 வன கால்நடை மருத்துவர்கள் மற்றும் கால்நடை பராமரிப்புத் துறையின் 2 கால்நடை மருத்துவர்கள், இறந்துபோன புலியின் உடலை பிரதே பரிசோத நடத்த உள்ளனர்.
புலிகளின் உடல் உள்ளுறுப்புகளில் இருந்து மாதிரிகள் எடுக்கப்பட்டு அவை நச்சுயியல் ஆய்வுக்கு அனுப்பப்படும். அதன் ஆய்வு முடிவில் புலிகள் இறப்புக்கு என்ன காரணம் எனத் தெரிய வரும்.
இது தொடர்பாகப் பேசிய வன ஆர்வலர் ஒருவர், நீலகிரி வனப் பகுதியில் புலிகள் சாவு தொடர் கதையாக உள்ளது. முதுமலை புலிகள் காப்பகத்தில் உள்ள சிறியூர் வனப்பகுதியில் பிறந்து 2 வாரங்களே ஆன 2 புலிக்குட்டிகள் இறந்து கிடந்தன. மற்றொரு இடத்தில் மேலும் ஒரு புலி இறந்து கிடந்தது.
நடுவட்டம் தேயிலைத் தோட்டத்தில் 7 வயதான புலி இறந்து கிடந்தது. தற்போது, அவலாஞ்சி வனப் பகுதியில் மேலும் 2 புலிகளின் செத்துக்கிடக்கின்றன. இப்படி, நீலகிரி மாவட்டத்தில் ஒரே மாதத்தில் மட்டும் 6 புலிகள் பலியான சம்பவம் அதிர்ச்சியை ஏற்படுத்தி உள்ளது.
எனவே, புலிகளை யாராவது வேட்டையாட இது போன்ற காரியங்களில் இறங்கினார்களா? எனத் தெரியவில்லை. ஆனால், புலிகள் இறப்பில் மர்மம் உள்ளது போல் தெரிகிறது. இதற்கு அரசு தான் தீர்வு காண வேண்டும் என வேதனையை வெளிப்படுத்தினார்.
