ஆசிய விளையாட்டுப் போட்டியின் தொடக்க விழா ஹாங்சோவில் உள்ள தாமரைப்பூ வடிவிலான ஒலிம்பிக் ஸ்போர்ட்ஸ் சென்டர் ஸ்டேடியத்தில் இன்று தொடங்குகிறது.
19 வது ஆசிய விளையாட்டுப் போட்டித் தொடர் சீனாவின் ஹாங்சோ நகரில், கலை நிகழ்ச்சிகளுடன் இன்று தொடங்கி அக்டோபர் 8 ஆம் தேதி வரை நடைபெறவுள்ளது. ஆசிய ஒலிம்பிக் கவுன்சில் அங்கீகாரம் பெற்ற இந்தியா, சீனா, பாகிஸ்தான், வங்கதேசம், மலேசியா என 45 நாடுகள் இந்தப் போட்டியில் பங்கேற்கின்றன. மொத்தம் 40 வகையான விளையாட்டுகளில், 61 பிரிவுகளில் போட்டிகள் நடைபெற உள்ளன. போட்டியில் சுமார் 12000 வீரர், வீராங்கனைகள் பங்கேற்கின்றனர்.
இதில் நீச்சல், வில்வித்தை, தடகளம், கூடைப்பந்து, கைப்பந்து, கிரிக்கெட், வாள்சண்டை, ஆக்கி, பேட்மிண்டன், கபடி, துப்பாக்கி சுடுதல், ஸ்குவாஷ், டென்னிஸ், டேபிள் டென்னிஸ், பளுதூக்குதல், மல்யுத்தம், குத்துச்சண்டை, செஸ், ஜிம்னாஸ்டிக்ஸ், படகுபந்தயம், கராத்தே, தேக்வாண்டோ உள்பட மொத்தம் 40 விளையாட்டுகளில் 481 போட்டிகள் நடக்க உள்ளன.
ஆசிய விளையாட்டுப் போட்டியின் தொடக்க விழா ஹாங்சோவில் உள்ள தாமரைப்பூ வடிவிலான ஒலிம்பிக் ஸ்போர்ட்ஸ் சென்டர் ஸ்டேடியத்தில் இந்திய நேரப்படி இன்று மாலை 5.30 மணிக்கு ஆரம்பமாகிறது. தொடக்க விழாவில் சீன அதிபர் ஜி ஜின்பிங் கலந்துக் கொண்டுப் போட்டியைத் தொடங்கி வைக்கிறார். பல நாட்டு தலைவர்கள் விழாவில் பங்கேற்கிறார்கள். தொடக்க விழாவில் சீனாவின் பாரம்பரியத்தைப் பறைசாற்றும் வகையில் கண்கவர் கலைநிகழ்ச்சிகள் நடைபெறுகின்றன.
தொடக்க விழா அணிவகுப்பில் போட்டியில் பங்கேற்கும் வீரர், வீராங்கனைகள் தங்கள் நாட்டு தேசியக் கொடியை ஏந்தி மிடுக்காக வலம் வருவார்கள். இந்த அணிவகுப்பில் இந்திய ஆக்கி அணியின் கேப்டன் ஹர்மன்பிரீத் சிங், உலக குத்துச்சண்டை சாம்பியன் லல்வினாப் போர்கோஹைன் ஆகியோர் இந்திய அணிக்கு தலைமை தாங்கி மூவர்ணத் தேசியக் கொடியை ஏந்தி செல்வார்கள்.
இந்திய அணியில் 655 வீரர், வீராங்கனைகள் இடம் பிடித்துள்ளனர். அவர்கள் 39 விளையாட்டுகளில் பங்கேற்கிறார்கள். கடந்த முறை இந்தியா 16 தங்கம் உள்பட 70 பதக்கங்கள் வென்று பதக்கப்பட்டியலில் 8-வது இடத்தை பிடித்தது. இந்த முறை குறைந்தபட்சம் 100 பதக்கங்களுக்கு மேல் வெல்லும் என்பதே இரசிகர்களின் எதிர்பார்ப்பாக உள்ளது.
