நீலகிரியில் தட்ப வெப்பநிலை மாறுபாடு காரணமாக, தென்மேற்கு மற்றும் வடகிழக்கு பருவமழை தாமதமாகத் தொடங்குகிறது. எதிர்பார்த்த அளவு இந்த ஆண்டு தென்மேற்கு பருவமழையும் பெய்யவில்லை. மேலும் இந்த மாதம் தொடங்க வேண்டிய வடகிழக்கு பருவமழையும் இதுவரை தொடங்கவில்லை.
நீலகிரி மாவட்டம் ஊட்டியில் வழக்கமாக நவம்பர் மாதத்தின் தொடக்கத்தில் உறைபனி தாக்கமும், மாதக் கடைசியில் பனிப்பொழிவும் அதிகரித்துக் காணப்படும். ஆனால், தற்போது வடகிழக்கு பருவமழை இன்னும் தொடங்காத நிலையில், முன்கூட்டியே பனிப்பொழிவு ஆரம்பித்து உள்ளது.
ஊட்டி நகரில் பெரும்பாலான இடங்களில், நேற்று நீர் பனிப்பொழிவு காணப்பட்டது. நீர் நிலைகள் அருகே உள்ள புல் மைதானங்கள், தாவரவியல் பூங்கா உள்ளிட்ட இடங்களில் நீர் பனிப்பொழிவு இருந்தது. மேலும், சாலைகளில் நிறுத்தி வைக்கப்பட்டு இருந்த வாகனங்கள் மீது நீர் பனி அதிகளவில் காணப்பட்டது.
ஊட்டியில் கடும் குளிர் நிலவுவதால், பொதுமக்களும், சுற்றுலாப் பயணிகளும் நெருப்பு மூட்டி குளிர்காய்ந்து வருகின்றனர். பனிப்பொழிவு காரணமாக, பொதுமக்களின் இயல்பு வாழ்க்கை பாதிக்கப்பட்டுள்ளது.
இரவு மற்றும் அதிகாலை வேளையில் நீர் பனிப்பொழிவும், பகல் நேரங்களில் கடும் வெயிலும் அதிகரித்து உள்ளது. இதனால் வருகிற நாட்களில் ஊட்டியில் உறைபனியின் தாக்கம் அதிகமாக இருக்கும் என்று வானிலை ஆய்வு மையம் தெரிவித்து உள்ளது
