தூத்துக்குடி குலசேகரன்பட்டினத்தில் உள்ள அருள்மிகு முத்தாரம்மன் திருக்கோவிலில் கொடியேற்றத்துடன் தசரா திருவிழா கோலாகலமாகத் தொடங்கியது.
தென் மாவட்டங்களில் பிரசித்தி பெற்ற திருக்கோவில், குலசேகரன்பட்டினம் முத்தாரம்மன் திருக்கோவிலாகும். இங்கு ஒவ்வோர் வருடமும் நவராத்திரியையொட்டி தசரா திருவிழா நடைபெறுவது வழக்கம். இந்த விழா தொடர்ந்து 11 நாட்கள் நடைபெறும்.
இந்த நிலையில், தசரா திருவிழா இன்று கொடியேற்றத்துடன் தொடங்கியது. முன்னதாக அதிகாலை 5 மணிக்கு யானை மீது கொடிப்பட்டம், வீதி உலா, காலை 6 மணிக்குச் சிறப்பு அபிஷேகம் நடைபெற்றது. காலை 9 மணிக்குத் திருக்கோவில் கொடி மரத்தில் கொடியேற்றப்பட்டது.
பின்னர் விரதம் இருந்து வரும் பக்தர்களுக்கு மஞ்சள் கயிறு காப்புக் கட்டப்பட்டது. காப்புக் கட்டிய பக்தர்கள் பல்வேறு வேடங்களை அணிந்து வீதி விதியாக உலா வந்தனர்.
இன்று முதல் அக்டோபர் 25 -ம் தேதி வரை தினமும் காலை முதல் இரவு வரை அம்மனுக்குச் சிறப்பு அபிஷேகம், ஆராதனைகள் நடைபெற உள்ளன. திருக்கோவில் முன்பு தினமும் மாலையில் திருமுறை, இன்னிசை, சமய சொற்பொழிவு, கோலாட்டம், பரதநாட்டியம் உள்ளிட்டவை நடைபெற உள்ளன.
மேலும், பள்ளி, கல்லூரி மாணவ மாணவிகளின் கலை நிகழ்ச்சிகள், பட்டிமன்றம், பக்தி வில்லிசை போன்றவையும் நடைபெற உள்ளன. தசரா விழாவின் உச்ச விழாவான சிரக நிகழ்வான மகிஷா சூரசம்காரம் வரும் 24 -ம் தேதி நடைபெற உள்ளது.
