கடந்த 56 ஆண்டுகளாக பாலஸ்தீன மக்கள் ஆக்கிரமிப்பு உள்ளிட்டவற்றால் பாதிக்கப்பட்டிருக்கிறார்கள். மேலும், காரணங்கள் இல்லாமல் ஹமாஸ் இஸ்ரேலை தாக்கவில்லை என்று கூறிய ஐ.நா. பொதுச்செயலாளர் மன்னிப்புக் கேட்பதோடு, பதவி விலகவும் வேண்டும் என்று இஸ்ரேல் வலியுறுத்தி இருக்கிறது.
இஸ்ரேல் மீது ஹமாஸ் தீவிரவாதிகள் கடந்த 7-ம் தேதி கொலைகாரத் தாக்குதல் நடத்தினர். இத்தாக்குதலில் 1,400-க்கும் மேற்பட்டோர் உயிரிழந்திருக்கிறார்கள். மேலும், 3,500-க்கும் மேற்பட்டோர் காயமடைந்திருக்கிறார்கள். அதோடு, இஸ்ரேலுக்குள் ஊடுருவிய ஹமாஸ் தீவிரவாதிகள் இஸ்ரேலியர்கள் மற்றும் வெளிநாட்டினர் உட்பட 200-க்கும் மேற்பட்டோரை பிணைக் கைதிகளாக பிடித்துச் சென்றிருக்கின்றனர்.
இதையடுத்து, காஸா மீது இஸ்ரேல் குண்டுமழை பொழிந்து வருகிறது. மேலும், பீரங்கி, டாங்கிகள் மூலமும், காலாட்படை மூலமும் அசுரத் தாக்குதல் நடத்தி வருகிறது. இத்தாக்குதலில் ஹமாஸ் தீவிரவாதிகள் உட்பட சுமார் 6,000 பேர் கொல்லப்பட்டிருக்கிறார்கள். மேலும், 17,000-க்கும் மேற்பட்டோர் காயமடைந்திருக்கிறார்கள். கடந்த 24 மணிநேரத்தில் மட்டும் 700-க்கும் மேற்பட்டோர் உயிரிழந்திருக்கிறார்கள். இன்று 19-வது நாளாக போர் தொடர்ந்து நடந்து வருகிறது.
இந்த நிலையில், ஐக்கிய நாடுகள் பாதுகாப்பு கவுன்சிலில் ஐ.நா. பொதுச்செயலாளர் அன்டோனியோ குட்டரெஸ் பேசும்போது, “இஸ்ரேலின் தொடர் குண்டு வீச்சு பெரும் அபாய ஒலியை ஏற்படுத்துகிறது. சர்வதேச மனித உரிமைச் சட்டம் இப்போரில் மீறப்படுவது வருத்தம் அளிக்கிறது.
10 லட்சத்துக்கும் மேற்பட்டோரை வடக்கு காசாவில் இருந்து தெற்கு காசாவுக்கு இடம் பெயர கூறிவிட்டு அங்கேயும் இஸ்ரேல் குண்டு வீசுகிறது. கடந்த 56 ஆண்டுகளாக பாலஸ்தீன மக்கள் ஆக்கிரமிப்பு உள்ளிட்டவற்றால் பாதிக்கப்பட்டிருக்கிறார்கள். காரணம் இல்லாமல் ஹமாஸ் இஸ்ரேலை தாக்கவில்லை. ஹமாஸ் தாக்குதலுக்காக பாலஸ்தீன மக்களுக்கு தண்டனை வழங்குவதை நியாயப்படுத்த முடியாது” என்று கூறியிருக்கிறார்.
ஐ.நா. பொதுச்செயலாளர் குட்டரெசின் இந்தக் கருத்துக்கு இஸ்ரேல் கடும் எதிர்ப்புத் தெரிவித்திருக்கிறது. இதுதொடர்பாக ஐ.நா.வுக்கான இஸ்ரேல் தூதர் கிலாட் இர்டான் கூறுகையில், “ஹமாஸ் தாக்குதலை ஐ.நா. பொதுச்செயலாளர் பொறுத்துக் கொண்டு நியாயப்படுத்துகிறார். அவர் பதவி விலக வேண்டும்” என்றார். அதேபோல, ஐ.நா. பொதுச்செயலாளர் மன்னிப்புக் கேட்க வேண்டும் என்று இஸ்ரேல் அமைச்சர் கோஹன் கூறியிருக்கிறார்.
