பெங்களூரு அருகே பொம்மனஹள்ளி பகுதியில் சாலையில் சென்ற சிறுத்தையை நாய்கள் துரத்தியதால், சிறுத்தை அங்கிருந்து பயந்து ஓடியது. அப்பகுதியில், சிறுத்தை நடமாட்டம் இருப்பதால், பொதுமக்கள் அச்சம் அடைந்துள்ளனர்.
பெங்களூரு பொம்மனஹள்ளி அருகே வனப்பகுதியை ஒட்டி, கூட்லு கேட் பகுதி அமைந்துள்ளது. இப்பகுதியில், சிறுத்தை உள்ளிட்ட வனவிலங்குகள் நடமாட்டம் காணப்படுகிறது.
இந்த நிலையில், கூட்லு கேட் பகுதியில் இருந்து நகர பகுதியான ஓசூர் சாலையில் சிறுத்தை ஒன்று நடமாடிய காட்சி அங்கிருந்த வீட்டில் பொருத்தப்பட்ட சிசிடிவி கேமராவில் பதிவாகி உள்ளது. அதில் ஒரு வீட்டின் அருகே சாலையில் சிறுத்தை ஒன்று தென்படுகிறது. அப்போது, அந்த சாலையில் இருந்த தெருநாய்கள் விரட்டியதும் சிறுத்தை அங்கிருந்து தப்பி ஓடுகிறது. இந்த காட்சிகள் தற்போது சமூக வலைத்தளங்களில் பகிரப்பட்டு வருகிறது. இதனால் கூட்லு கேட் பகுதியில் உள்ள மக்கள் பீதி அடைந்து உள்ளனர்.
இதனைத் தொடர்ந்து, சிறுத்தையைப் பிடிக்க தென்கிழக்கு பெங்களூருவில் உள்ள ஏஇசிஎஸ் லேஅவுட், சிங்கசந்திரா, குட்லு கேட் ஆகிய பகுதிகளில் வனத்துறை அதிகாரிகள் குழு தேடுதல் மற்றும் கண்காணிப்பு நடவடிக்கையில் ஈடுபட்டு வருகின்றனர்.
இது குறித்து வனத்துறை அதிகாரிகள் கூறுகையில், சிறுத்தை இருப்பதற்கான எந்த அறிகுறியும் இல்லை. அது பெரிய பூனையாக இருக்கலாம் என்பதால், பொதுமக்கள் பீதி அடைய வேண்டாம். நேற்றிரவு ஒரு குழுவைச் சம்பந்தப்பட்ட பகுதிக்கு அனுப்பியிருந்தோம். நாங்கள் தொடர்ந்து, கண்காணித்து வருகிறோம். எச்சரிக்கையுடன் இருக்க அறிவுறுத்தியுள்ளோம் என்றனர்.
இதனிடையே பரப்பன அக்ரஹாரா காவல்துறையினர் சிறுத்தை இருப்பதை உறுதி செய்தனர். பெங்களூரு மற்றும் அதன் சுற்றுவட்டாரப் பகுதிகளில் சிறுத்தை காணப்படுவது இது முதல் முறையல்ல. கடந்த ஆண்டும் புறநகரில் சிறுத்தை நடமாட்டம் குறித்த காட்சிகள் பலமுறை பதிவாகி இருந்தன என்பது குறிப்பிடத்தக்கது.
