புதுடெல்லியில் சமூகநலத்துறை அமைச்சர் ராஜ்குமார் ஆனந்த் இல்லத்தில் அமலாக்கத்துறை அதிகாரிகள் இன்று காலை முதல் அதிரடி சோதனை நடத்தி வருகின்றனர்.
புதுடெல்லியில் முதல்வர் அரவிந்த் கெஜ்ரிவால் தலைமையிலான ஆம் ஆத்மி ஆட்சி நடைபெற்று வருகிறது. இந்த நிலையில், சமூகநலத் துறை அமைச்சர் ராஜ் குமார் ஆனந்த் இல்லத்தில் அமலாக்கத் துறை அதிகாரிகள் இன்று காலை முதல் திடீர் சோதனை நடத்தி வருகின்றனர்.
சட்ட விரோத பணப் பரிவர்த்தனை தொடர்பான வழக்கில் புதுடெல்லி சமூக நலத்துறை அமைச்சர் ராஜ்குமார் ஆனந்த் தொடர்புடைய 9 இடங்களில் அமலாக்கத் துறை அதிகாரிகள் சோதனை நடத்தி வருகின்றனர்.
சுங்கத்துறை சம்பந்தமான இந்த வழக்கில் அமைச்சர் ஆனந்த் ஹவாலா பண மோசடியில் ஈடுபட்டதாகச் சந்தேகிக்கத்தின் அடிப்படையில் இந்த சோதனை நடைபெறுகிறது.
ஏற்கனவே, டெல்லியில் ஆட்சி நடத்தும் ஆம் ஆத்மி அரசு கடந்த 2021 நவம்பரில் புதிய மதுபான கொள்கையை அமல்படுத்தி, 849 மதுபான கடைகளைத் தனியாருக்கு வழங்கியதில், அரசுக்கு ரூ.2,800 கோடி வரை இழப்பு ஏற்பட்டதாக சிபிஐ, அமலாக்கத் துறை தனித்தனியாக வழக்குப் பதிவு செய்து விசாரணை நடத்தி வருகிறது.
இதே வழக்கில் அம்மாநில துணை முதல்வர் சிசோடியா கைது செய்யப்பட்டு சிறையில் உள்ளார். இந்த நிலையில், டெல்லி மதுபானக் கொள்கை வழக்கில், அம்மாநில முதல்வர் அரவிந்த் கெஜ்ரிவால் நேரில் ஆஜராக அமலாக்கத் துறை தற்போது சம்மன் அனுப்பியுள்ளது குறிப்பிடத்தக்கது.
