காசா மீது தாக்குதல் நடத்தி வரும் இஸ்ரேல் பொதுமக்கள் வெளியேற அனுமதிக்கும் வகையில் தினமும் 4 மணிநேரம் போர் நிறுத்தம் செய்ய ஒப்புக்கொண்டுள்ளது.
இஸ்ரேல் மீது ஹமாஸ் இயக்கத்தினர் தாக்குதல் நடத்தியதைத்தொடர்ந்து காசா மீது பதிலடி தாக்குதலில் அந்நாடு ஈடுபட்டுள்ளது. ஹமாஸ் அமைப்பினரின் கோட்டையாகத் திகழும் காஸா சிட்டிக்குள் நுழைந்து அவா்களை வேட்டையாடுவதற்காக அந்த நகரை நோக்கி இஸ்ரேல் ராணுவம் முன்னேறி வருகிறது.
காசா சிட்டியிலும் வடக்கு காஸா பகுதிகளிலும் வசிக்கும் பொதுமக்கள் தெற்கு காஸாவுக்கு வெளியேற இஸ்ரேல் ராணுவம் உத்தரவிட்டது.
இந்நிலையில் அமெரிக்க அதிபர் ஜோ பைடன் இஸ்ரேல் பிரதமர் பெஞ்சமன் நெதன்யாகுவிடம் தொலைபேசியில் தொடர்பு கொண்டு பேசினார்.
இதுதொடர்பாக வெள்ளை மாளிகை செய்திக்குறிப்பை ஒன்றை வெளியிட்டுள்ளது.
அதில் காசாவிலிருந்து பொதுமக்கள் வெளியேறுவதற்கு வசதியாக தினமும் ஒரு குறிப்பிட்ட நேரத்துக்கு அந்தப் பகுதியில் தாக்குதலை நிறுத்த வேண்டும் என்று நெதன்யாகுவை பைடன் கேட்டுக்கொண்டாா். அதனை ஏற்று, தினமும் 4 மணி நேரத்துக்கு காசாவில் தாக்குதலை நிறுத்த இஸ்ரேல் அரசு ஒப்புக்கொண்டுள்ளது.
இந்த தினசரி தாக்குதல் நிறுத்தம் வியாழக்கிழமை (நவ. 9) முதல் அமலுக்கு வருவதாக அதில் தெரிவிக்கப்பட்டுள்ளது. இந்த நேரத்தில் முறையான போர்நிறுத்தத்திற்கு சாத்தியம் இல்லை என்றும் அதில் கூறப்பட்டுள்ளது.
