இந்தியா – சீனா போரில் பயன்படுத்தப்பட்ட பிரிட்டிஷ் காலத்தைச் சேர்ந்த 7,000 துப்பாக்கிகளை அகற்ற டெல்லி காவல்துறை முடிவு செய்துள்ளது.
இங்கிலாந்து நாட்டின் ஆயுத தொழிற்சாலையில் தயாரிக்கப்பட்டது 303 காலிபர் லீ-என்ஃபீல்டு வகைத் துப்பாக்கிகள். இவை முதல் மற்றும் இரண்டாம் உலகப் போர்களில் அதிகளவில் பயன்படுத்தப்பட்டது. இந்த துப்பாக்கிகள் சுமார் 5 கிலோ எடை கொண்டவை.
கடந்த 1962 -ம் ஆண்டு இந்தியா – சீனா இடையே நடைபெற்ற போரில் இந்திய ராணுவம், 303 காலிபர் லீ-என்ஃபீல்டு துப்பாக்கிகளைப் பயன்படுத்தியது.
உத்தரபிரதேசம், மகாராஷ்டிரா காவல்துறை நிர்வாகம் ஏற்கனவே 303 காலிபர் லீ-என்ஃபீல்டு ரகத் துப்பாக்கிகள் பயன்படுத்துவதை நிறுத்தி விட்டன.
இந்த நிலையில், டெல்லி காவல்துறையும் 303 காலிபர் லீ-என்ஃபீல்டு துப்பாக்கிகளைப் பயன்படுத்துவதை நிறுத்த முடிவு செய்துள்ளது. குறிப்பாக, இந்த வகையைச் சேர்ந்த 7 ஆயிரம் துப்பாக்கிகள் டெல்லி காவல்துறையில் இருந்து அகற்ற முடிவு செய்யப்பட்டுள்ளது.
