மத்திய நிதி அமைச்சர் நிர்மலா சீதாராமன் முயற்சியால் இலங்கை கடற்படையால் சிறைபிடிக்கப்பட்ட தமிழக மீனவர்கள் 22 பேர் விடுவிக்கப்பட்டனர்.
இராமநாதபுரம் மாவட்டம், பாம்பன் பகுதியை சேர்ந்த மீனவர்கள் 22 பேர் இரு நாட்டுப்படகுகளில் கடலுக்கு மீன்பிடிக்கச் சென்றனர். நேற்று நடுக்கடலில் மீன்பிடித்து கொண்டிருந்த போது, அங்கு சென்ற இலங்கை கடற்படையினர் மீனவர்கள் 22 பேரையும் சிறைபிடித்துச் சென்றனர். அவர்களின் இரு படகுகளும் பறிமுதல் செய்தனர்.
கைது செய்யப்பட்ட மீனவர்கள் காங்கேசன் துறைமுகத்திற்கு அழைத்துச் செல்லப்பட்டனர். இந்நிலையில், இராமேசுவரத்திற்கு வந்த மத்திய நிதி அமைச்சர் நிர்மலா சீதாராமனை பாதிக்கப்பட்ட மீனவர்களின் குடும்பத்தினர் சந்தித்து, அவர்களை உடனடியாக விடுவிக்க நட வடிக்கை எடுக்க வேண்டும் என கேட்டுக்கொண்டனர்.
இதனையடுத்து இலங்கை அரசுடன் நிதியமைச்சர் நிர்மலா சீதாராமன் பேசி கைது செய்யப்பட்டவர்கள், பாராம்பிரிய மீனவர்கள் என்று எடுத்து கூறி அவர்களை விடுவிக்க வேண்டும் என கேட்டுக்கொண்டார்.
இதனையடுத்து 22 மீனவர்களும் உடனடியாக விடுவிக்கப்பட்டனர். சிறைபிடிக்கப்பட்ட சில மணி நேரங்களில் விடுதலை செய்யப்பட்டது மீனவர்கள் மற்றும் உறவினர்களிடையே மகிழ்ச்சியை ஏற்படுத்தியுள்ளது.
அவர்கள் நிதியமைச்சர் நிர்மலா சீதாராமனுக்கு நன்றி தெரிவித்துக்கொண்டனர். விடுவிக்கப்பட்ட மீனர்வர்கள் அனைவரும் இன்று பாம்பன் துறைமுகத்திற்கு வருகின்றனர்.
