செம்பரம்பாக்கம் ஏரியின் நீர்மட்டம் வேகமாக உயர்ந்து வருவதால், ஏரியிலிருந்து திறக்கப்படும் நீரின் அளவை ஆயிரத்து 500 கன அடியிலிருந்து 3 ஆயிரம் கன அடியாக அதிகரித்து திறக்கப்பட்டுள்ளது.
தமிழகத்தில் வடகிழக்குப் பருவமழை தீவிரமடைந்து, கடந்த சில வாரங்களாக கனமழை பெய்து வருவதால், முக்கிய நீர் நிலைகள் நிரம்பி வருகின்றன.
சென்னை மாநகருக்குக் குடிநீர் வழங்கும் பூண்டி, சோழவரம், புழல், கண்ணன்கோட்டை தேர்வாய்கண்டிகை, செம்பரம்பாக்கம் மற்றும் வீராணம் ஆகிய 6 ஏரிகளின் நீர்ப்பிடிப்பு பகுதிகளில் பரவலாக மழை பெய்து வருகிறது. இதனால் ஏரிகளுக்கு வரும் நீரின் அளவு அதிகரித்து உள்ளது.
24 அடி நீா் உயரம் கொண்ட செம்பரம்பாக்கம் ஏரியின் நீா்மட்டம் 20.74 அடியாக உள்ளது. தொடர்ந்து பெய்து வரும் கனமழையால் செம்பரம்பாக்கம் ஏரிக்கு வரும் நீரின் அளவு அதிகரித்து வருகிறது.
செம்பரம்பாக்கம் ஏரியின் பாதுகாப்பு கருதி, ஏரியில் இருந்து ஆயிரத்து 500 கன அடி உபரி நீர் வெளியேற்றப்பட்ட நிலையில், 3 ஆயிரம் கன அடியாக உயர்த்தி திறக்கப்பட்டுள்ளது.
இன்று முதல் கனமழை பெய்ய வாய்ப்புள்ளதால், செம்பரம்பாக்கம் ஏரியின் நீா்மட்டத்தை அதிகாரிகள் தொடர்ந்து கண்காணித்து வருகின்றனர்.
