கோவை மத்திய சிறை கைதி ஆசிப் என்பவர் பேப்பரில் ISIS கொடியை வரைந்துள்ளார். அதனை சிறைக் காவலர்கள் பறிமுதல் செய்துள்ளனர்.
ஈரோடு மாவட்டம் மாணிக்கம்பாளையம் பகுதியைச் சேர்ந்தவர் ஆசிப் முஸ்தஹீன் (வயது 30). இவர் ஐ.எஸ்.ஐ.எஸ். ஆதரவாளர். இவரை சட்ட விரோத செயல்கள் தடுப்புச் சட்டத்தில் கைது செய்து கோவை மத்திய சிறையில் அடைத்தனர்.
இந்நிலையில், கோவை மத்திய சிறை ஜெயிலர் கடந்த நவம்பர் மாதம் 27 -ம் தேதி ஆசிப் முஸ்தகின் அறையை சோதனையிட்டார். அப்போது, அவரது பேன்ட் பாக்கெட்டில் ஒரு பேப்பர் இருந்தது. அதை அவர்கள் கைப்பற்றினர்.
அதில், ஐ.எஸ்.ஐ.எஸ். அமைப்பின் கொடியை வரைந்து இருப்பது தெரிய வந்தது. இது குறித்து போலீசார் விசாரித்த போது, நீதிமன்றத்திற்கு மனு எழுத கொடுக்கப்பட்ட பேப்பரில் ஐ.எஸ்.ஐ.எஸ். அமைப்பின் கொடிகளை வரைந்துள்ளது தெரிய வந்தது.
மேலும், சிறை வளாகத்தில் ஜெயிலர் சிவராஜன் கண்காணிப்புப் பணியில் ஈடுபட்டபோது, விரைவில் சிறையிலிருந்து வெளியே வருவேன். பின்னர், ஐ.எஸ்.ஐ.எஸ் அமைப்பிற்காக ஜிஹாத் பணியைத் தொடர்வேன் என்றும், அப்போது நீங்களும் இருக்க மாட்டீர்கள், இந்த சிறைச்சாலையும் இருக்காது என மிரட்டல் விடுத்தாக கூறப்படுகிறது.
இது தொடர்பாக, ஜெயிலர் சிவராஜன், ரேஸ்கோர்ஸ் காவல் நிலையத்தில் புகார் கொடுத்தார். அதன் பேரில், ஆசிப் முஸ்தஹீன் மீது உபா சட்டம், கொலை மிரட்டல், அரசு ஊழியரை பணி செய்ய விடாமல் தடுத்தல் ஆகிய பிரிவுகளின் கீழ் வழக்குப் பதிவு செய்துள்ளனர். மேலும், ஆசிப்பிடம் இருந்து பறிமுதல் செய்யப்பட்ட பேப்பர் கொடியினைக் காவல் துறையினரிடம் ஜெயில் அதிகாரிகள் ஒப்படைத்துள்ளனர். இந்த நிலையில், ஆசிப் தொடர்பான வழக்கு விவகாரங்களை, என்ஐஏ அதிகாரிகளிடம் வழங்க வேண்டும் என கோரிக்கை எழுந்துள்ளது.
