ஜனவரி 1-ம் தேதி காலை 9.10 மணியளவில் விண்ணில் செலுத்தப்படும் பி.எஸ்.எல்.வி. சி-58 ராக்கெட்டுக்கான 25 மணிநேர கவுண்டவுன் நாளை காலை 8.10 மணிக்குத் தொடங்குகிறது.
கேரள மாணவிகள் தயாரித்த வெசாட் செயற்கைக்கோளுடன், வெளிநாட்டு செயற்கைக்கோள்கள் சிலவற்றையும் இந்திய விண்வெளி ஆராய்சி மையமான இஸ்ரோ ஜனவரி 1-ம் தேதி விண்ணில் செலுத்துகிறது. இதற்கான 25 மணி நேர கவுண்டவுன் நாளை காலை 8.10 மணிக்கு தொடங்குகிறது.
இதுகுறித்து இஸ்ரோ மூத்த விஞ்ஞானிகள் கூறுகையில், “ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி ஆய்வு மையத்தில் இருந்து ஜனவரி 1-ம் தேதி காலை 9.10 மணியளவில் பி.எஸ்.எல்.வி. சி-58 ராக்கெட் விண்ணில் ஏவப்படுகிறது.
இந்த ராக்கெட்டில் 5 ஆண்டுகள் ஆயுட்காலத்தை கொண்ட ‘எக்ஸ்போசாட்’ என்ற செயற்கைக்கோள் பொருத்தப்பட்டிருக்கிறது. இந்த செயற்கைக்கோள் 500-700 கிலோ மீட்டர் வட்டமான பூமியின் சுற்றுப்பாதையில் நிலைநிறுத்தப்பட இருக்கிறது.
இந்த செயற்கைகோள், எக்ஸ்ரே மூலங்களின் தற்காலிக நிலை, நிறமாலை போன்ற அறிவியல் ஆய்வுகளையும், விண்வெளியில் உள்ள தூசு, கருந்துளை வாயுக்களின் மேகக் கூட்டமான ‘நெபுலா’ உள்ளிட்டவற்றையும் ஆராயவிருக்கிறது.
மேலும், திருவனந்தபுரம் லால் பகதூர் சாஸ்திரி பல்கலைக்கழக மாணவிகள், பூமியின் மேல் பரப்பில் உள்ள புற ஊதா கதிர்கள் மற்றும் கேரள மாநிலத்தின் தட்பவெப்ப நிலையை அறிந்து கொள்வதற்காக வெசாட் என்ற செயற்கைக்கோளை வடிவமைத்திருந்தனர்.
இந்த செயற்கைக்கோளுடன், வெளிநாட்டு செயற்கைக்கோள்கள் சிலவற்றையும் இஸ்ரோ விண்ணில் செலுத்துகிறது. இதற்கான இறுதிக் கட்டப் பணியான 25 மணி நேர கவுண்டவுன் நாளை காலை 8.10 மணிக்கு தொடங்குகிறது.
ராக்கெட்டுக்கான எரிபொருள் நிரப்பும் பணி நிறைவடைந்துள்ள நிலையில், செயற்கைக்கோள் செயல்பாடு மற்றும் ராக்கெட் செயல்பாடுகளை விஞ்ஞானிகள் தீவிரமாக கண்காணித்து வருகின்றனர்.
ராக்கெட் விண்ணில் ஏவப்படுவதை மாணவர்கள் மற்றும் பொதுமக்கள் என 10,000 பேர் அமர்ந்து பார்வையிடும் வகையில் பார்வையாளர்கள் மாடம் அமைக்கப்பட்டிருக்கிறது. நேரில் செல்ல விரும்பும் பார்வையாளர்கள் https://lvg.shar.gov.in என்ற இணையதள முகவரியில் பெயர்களை முன்பதிவு செய்து, அனுமதி சீட்டை பெற்றுக் கொள்ள வேண்டும்” என்று தெரிவித்திருக்கின்றனர்.
