பிரதமரின் வீட்டுவசதித் திட்டத்தின் கீழ், கடந்த 3-ஆம் தேதி வரை தமிழ்நாட்டில் 7 இலட்சத்து 50 ஆயிரத்து 521 பயனாளிகளுக்கு வீடுகள் வழங்கப்பட்டுள்ளன.
இதுகுறித்து மக்களவையில் கேட்கப்பட்ட கேள்வி ஒன்றுக்கு மத்திய கிராம வளர்ச்சித்துறை இணையமைச்சர் சாத்வி நிரஞ்சன் ஜோதி எழுத்துப்பூவமாக பதிலளித்தார்.
இதுகுறித்து மத்திய இணையமைச்சர் சாத்வி நிரஞ்சன் ஜோதி கூறியிருப்பதாவது, கிராமப்புறங்களில் அனைவருக்கும் வீட்டுவசதி என்ற நோக்கத்தில் பிரதமரின் கிராமப்புற வீட்டு வசதித் திட்டம் கடந்த 2016-ஆம் ஆண்டு ஏப்ரல் மாதம் முதல் செயல்படுத்தப்பட்டு வருகிறது.
இத்திட்டத்தின் கீழ், 2024-ஆம் ஆண்டு மார்ச் மாதத்திற்குள் அடிப்படை வசதிகளுடன் கூடிய 2 கோடியே 95 இலட்சம் வீடுகள் கட்ட திட்டமிடப்பட்டது. இந்த இலக்கில் 2 கோடியே 94 இலட்சம் வீடுகள் கட்டுவதற்கான அனுமதி வழங்கப்பட்டுவிட்டது. இதில், பிப்ரவரி 3-ஆம் தேதி வரை 2 கோடியே 55 இலட்சம் வீடுகள் கட்டி முடிக்கப்பட்டுள்ளன.
இந்தத் திட்டத்தில் கடந்த 2020-ஆம் ஆண்டு முதல் 2023-ஆம் ஆண்டு வரை, தமிழ்நாட்டுக்கு 3 ஆயிரத்து 10 கோடி ரூபாய்க்கு மேல் நிதி ஒதுக்கப்பட்டது. இதில், மாநில அரசு பங்குத் தொகையுடன் சேர்த்து இதுவரை 3 ஆயிரத்து 630 கோடி ரூபாய்க்கும் அதிகமான நிதி பயன்படுத்தப்பட்டுள்ளது.
பிப்ரவரி 3-ஆம் தேதி வரை, தமிழ்நாட்டில் 7 இலட்சத்து 50 ஆயிரத்து 521 பயனாளிகளுக்கு வீடுகள் வழங்கப்பட்டுள்ளன. 900 பயனாளிகளுக்கு இன்னும் வீடு கட்டுவதற்கான அனுமதி வழங்கப்படவில்லை என்று கூறினார்.
