அ.தி.மு.க ஆட்சியில் 2011 – 2015-ம் ஆண்டு போக்குவரத்துத்துறை அமைச்சராக இருந்தவர் செந்தில் பாலாஜி. இவர், பலருக்கும் வேலை வாங்கித் தருவதாகக் கூறி சட்ட விரோதமாகக் கோடிக்கணக்கில் பணம் பெற்றதாகக் குற்றச்சாட்டு எழுந்தது. இந்த விவகாரம் தொடர்பாக, போலீசார் வழக்குப் பதிவு செய்து விசாரணை நடத்தி வருகின்றனர்.
இதில், அமலாக்கத்துறையும் தன்னை இணைத்துக் கொண்டு விசாரணை நடத்தி வருகின்றது. இதனைத் தொடர்ந்து, அமைச்சர் செந்தில் பாலாஜி, அவரது தம்பி அசோக் குமார் உள்ளிட்டோர் வீடுகளில், அமலாக்கத்துறை அதிகாரிகள் சோதனை நடத்தி, முக்கிய ஆவணங்களைக் கைப்பற்றினர்.
அதன்பேரில், அமைச்சர் செந்தில் பாலாஜி மீது சட்ட விரோத பணப் பரிமாற்ற வழக்கின் கீழ், வழக்குப் பதிவு செய்தஅமலாக்கத்துறையினர், கடந்த ஜூன் 14 -ம் தேதி செந்தில் பாலாஜியை கைது செய்தனர்.
சென்னை புழல் சிறையில் அடைக்கப்பட்டுள்ள செந்தில் பாலாஜி இலாகா இல்லாத அமைச்சராக அறிவிக்கப்பட்டார். அண்மையில், அமைச்சர் பதவியை, செந்தில் பாலாஜி ராஜினாமா செய்தார்.
இதனிடையே, செந்தில் பாலாஜி ஜாமீன் தொடர்பான வழக்குச் சென்னை உயர் நீதிமன்றத்தில் நடைபெற்று வருகிறது. செந்தில் பாலாஜி 30 -வழக்குகளில் தொடர்புடையவர் என்பதால், அவருக்கு ஜாமீன் வழங்க கூடாது என அமலாக்கத்துறை கடும் எதிர்ப்பு தெரிவித்து வருகிறது.
இந்த நிலையில், அமலாக்கத்துறைக்கு எதிராகத் தனது மனுவை அவசர வழக்காக விசாரிக்க வேண்டும் என செந்தில் பாலாஜியின் கோரிக்கையை சென்னை உயர் நீதிமன்றம் ஏற்க மறுத்துவிட்டது.
திங்கள் கிழமைக்குப் பதிலாக, வரும் புதன்கிழமை விசாரிக்கப்படும் என நீதிபதி ஆனந்த் வெங்கடேஷ் அறிவித்துள்ளார்.
