தமிழ்நாட்டில் 2006 முதல் 2011-ம் ஆண்டு வரை தி.மு.க ஆட்சிக் காலத்தில், வீட்டு வசதித்துறை அமைச்சராக இருந்தவர் ஐ.பெரியசாமி. இவர் தற்போது தமிழகக் கூட்டுறவுத் துறை அமைச்சராக உள்ளார்.
கடந்த 2008-ம் ஆண்டு தமிழ்நாடு வீட்டு வசதி வாரியத்துக்குச் சொந்தமான வீட்டை, முன்னாள் முதலமைச்சர் கருணாநிதியின் பாதுகாப்பு அதிகாரி கணேசனுக்கு முறைகேடாக ஒதுக்கியதாகக் குற்றச்சாட்டு எழுந்தது. இதுகுறித்து, அ.தி.மு.க ஆட்சியில் வழக்குப் பதிவு செய்யப்பட்டது.
இந்த வழக்கை விசாரித்த எம்.பி, எம்.எல்.ஏக்கள் மீதான சிறப்பு நீதிமன்றம், அமைச்சர் ஐ.பெரியசாமியை விடுதலை செய்தது. இந்த வழக்கை, சென்னை உயர் நீதிமன்றத்தின் நீதிபதி என்.ஆனந்த் வெங்கடேஷ் தாமாக முன்வந்து மறுஆய்வு விசாரணைக்கு எடுத்தார்.
இந்த நிலையில் கடந்த பிப்.13-ம் தேதி அனைத்துத் தரப்பு வாதங்கள் நிறைவடைந்த நிலையில், தீர்ப்பு தேதி குறிப்பிடாமல் தள்ளிவைக்கப்பட்டது. இந்த நிலையில், இந்த வழக்கில் நீதிபதி என்.ஆனந்த் வெங்கடேஷ் தீர்ப்பு வழங்கினார்.
அதில் , அமைச்சர் ஐ.பெரியசாமியை விடுவித்த சிறப்பு நீதிமன்ற உத்தரவு ரத்து செய்யப்படுகிறது. முறையாக ஒப்புதல் பெற்று வழக்கை நடத்த வேண்டும் என தமிழ்நாடு லஞ்ச ஒழிப்புத்துறைக்கு உத்தரவிட்டார்.
