ஐஎஸ்ஐஎஸ் தீவிரவாத அமைப்பில் சேர போகிறேன் என்றும், அந்த அமைப்புக்கு ஆதரவு தெரிவிக்கிறேன் என்றும் கூறி ஆன்லைனில் பதிவிட்ட ஐஐடி கௌகாத்தியில் பயின்று வந்த மாணவனை போலீசார் கைது செய்தனர்.
கடந்த சில நாட்களுக்கு முன், ஐஎஸ்ஐஎஸ் இந்தியா அமைப்பின் தலைவர் மற்றும் அவருடைய நெருங்கிய கூட்டாளி ஆகிய இருவரை அசாமின் துப்ரி மாவட்டத்தில் வைத்து போலீசார் கைது செய்தனர். இதனைத் தொடர்ந்தே, ஐஐடி கௌகாத்தியில் பயின்று வந்த மாணவனை போலீசார் கைது செய்தனர்.
அவர் ஆன்லைனில் விருப்பம் தெரிவித்ததுடன், இ-மெயில்களையும் அனுப்பி இருக்கிறார். இதனை ஆய்வு செய்தபோதுதான் போலீசாருக்கு முழு விவரமும் தெரியவந்தது.
அவர்கள் ஐ.ஐ.டி. கௌகாத்தி கல்வி நிலைய அதிகாரிகளை தொடர்பு கொண்டனர். ஆனால், அந்த மாணவன் காணவில்லை என்றும், அவருடைய மொபைல் போன் அணைக்கப்பட்டு விட்டது என்றும் அவர்கள் கூறியுள்ளனர். பின்னர், அந்த மாணவனை போலீசார் தீவிரமாக தேடி வந்த நிலையில், அசாமில் கைது செய்தனர்.
அந்த மாணவரின் அறையில், ஐஎஸ்ஐஎஸ் அமைப்புடன் தொடர்புடைய கருப்பு கொடி ஒன்று இருந்தது. அவர் எழுதிய இஸ்லாம் பற்றிய குறிப்புகளும் கைப்பற்றப்பட்டன.
இதுகுறித்து போலீசார் கூறியதாவது, மாணவரின் அறையில் இருந்து கைப்பற்றப்பட்ட பொருட்களை நாங்கள் ஆய்வு செய்ய இருக்கிறோம். அதன்பிறகே ஒரு முடிவுக்கு வரமுடியும். மாணவன் இ-மெயில் அனுப்பியதற்கான நோக்கம் பற்றி தீவிர விசாரணை நடத்தப்பட்டு வருவதாக கூறினார்.
