ராஜஸ்தான் ராயல்ஸ் அணி 20 ரன்கள் வித்தியாசத்தில் லக்னோ சூப்பர் ஜெயண்ட்ஸ் அணியை வீழ்த்தி வெற்றி பெற்றது.
இந்தியன் பிரீமியர் லீக்கின் 17-வது சீசன் மார்ச் 22 ஆம் தேதி தொடங்கியது. இதில் மொத்தம் 10 அணிகள் பங்குபெற்றுள்ளது.
சென்னை சூப்பர் கிங்ஸ், டெல்லி கேப்பிட்டல்ஸ், குஜராத் டைட்டன்ஸ்,கொல்கத்தா நைட் ரைடர்ஸ், லக்னோ சூப்பர் ஜெயண்ட்ஸ், மும்பை இந்தியன்ஸ், பஞ்சாப் கிங்ஸ், ராஜஸ்தான் ராயல்ஸ், ராயல் சேலஞ்சர்ஸ் பெங்களூரு, சன் ரைசர்ஸ் ஹைதராபாத் ஆகிய அணிகள் கலந்துகொண்டுள்ளன.
இந்த தொடரின் மூன்றாம் நாளான நேற்று இரண்டு போட்டிகள் நடைபெற்றது. இதன் முதல் போட்டி ஜெய்ப்பூரில் உள்ள சவாய் மான்சிங் மைதானத்தில் ராஜஸ்தான் ராயல்ஸ் மற்றும் லக்னோ சூப்பர் ஜெயண்ட்ஸ் அணிகளுக்கு இடையே நடைபெற்றது.
இதில் டாஸ் வென்ற ராஜஸ்தான் ராயல்ஸ் அணி முதலில் பேட்டிங்கை தேர்வு செய்தது. அதன்படி முதலில் பேட்டிங் செய்த ராஜஸ்தான் ராயல்ஸ் அணி 4 விக்கெட்கள் இழப்பிற்கு 193 ரன்களை எடுத்துள்ளது.
இதில் தொடக்க வீரராக களமிறங்கிய ஜோஸ் பட்லர் 2 பௌண்டரீஸ் அடித்து 11 ரன்களில் ஆட்டமிழந்தார். பின்னர் விளையாடி வந்த யசஸ்வி ஜைஸ்வால் 3 பௌண்டரீஸ் மற்றும் 1 சிக்சர் என 5 வது ஓவர் முடிவில் 24 ரன்களை எடுத்து ஆட்டமிழந்தார்.
பின்னர் களமிறங்கிய சஞ்சு சாம்சன் மற்றும் பராக் கூட்டணி அதிரடியாக விளையாடி ரன்களை குவித்து வந்தது. சஞ்சு சாம்சன் 33 பந்துகளில் தனது அரைசதத்தை எடுத்தார்.
அதேபோல் சிறப்பாக விளையாடி வந்த பராக் அவரும் அரைசதம் எடுப்பார் என்று எதிர்பார்த்த நேரத்தில் 15வது ஓவரில் 1 பௌண்டரி மற்றும் 3 சிக்சர்கள் அடித்து மொத்தமாக 29 பந்துகளில் 43 ரன்களை எடுத்து ஆட்டமிழந்தார்.
பின்னர் களமிறங்கிய சிம்ரோன் ஹெட்மையர் 5 ரன்களில் ஆட்டமிழக்க அவரை தொடர்ந்து களமிறங்கினார் இளம் வீரர் துருவ் ஜூரல். சஞ்சு சாம்சன் மற்றும் துருவ் ஜூரல் கூட்டணியும் சிறப்பாக விளையாடி ரன்களை குவித்து வந்தனர்.
பின்னர் 20 ஓவர்கள் முடிவில் துருவ் ஜூரல் 1 பௌண்டரி மற்றும் 1 சிக்சர் என 12 பந்துகளில் 20* ரன்களை எடுத்தார். அதேபோல் சஞ்சு சாம்சன் 3 பௌண்டரீஸ் மற்றும் 6 சிக்சர்கள் என மொத்தமாக 52 பந்துகளில் 82* ரன்களை எடுத்தார்.
இதனால் ராஜஸ்தான் ராயல்ஸ் 20 ஓவர்கள் முடிவில் 4 விக்கெட்கள் இழப்பிற்கு 193 ரன்களை எடுத்தது. லக்னோ அணியில் அதிகபட்சமாக நவீன் 2 விக்கெட்களை வீழ்த்தினார்.
அதேபோல் ரவி பிஷ்னோய் மற்றும் மொஹ்சின் கான் தலா 1 விக்கெட்டை வீழ்த்தினார். இதனால் தற்போது லக்னோ சூப்பர் ஜெயண்ட்ஸ் அணிக்கு 194 என்ற பெரிய இலக்கு நிர்ணயிக்கப்பட்டது.
இதை தொடர்ந்து பேட்டிங் செய்த லக்னோ அணியின் தொடக்க வீரரான குவின்டன் டி காக் 4 ரன்களில் ஆட்டமிழக்க, பின்னர் களமிறங்கிய தேவதூத் படிக்கல் டக் அவுட் ஆனார்.
தொடர்ந்து களமிறங்கிய ஆயுஷ் படோனி 1 ரன்னில் ஆட்டமிழந்தார். இப்படி வீரர்கள் அடுத்தடுத்து ஆட்டமிழக்க மற்றொரு தொடக்க வீரராக களமிறங்கிய லக்னோ அணியின் கேப்டன் கே.எல். ராகுல் 4 பௌண்டரீஸ் மற்றும் 2 சிக்சர்கள் என மொத்தமாக 44 பந்துகளில் 58 ரன்களை அடித்து ஆட்டமிழக்காமல் இருந்தார்.
பின்னர் களமிறங்கிய தீபக் ஹூடா 26 ரன்களில் ஆட்டமிழக்க, நிக்கோலஸ் பூரன் 64 ரன்கள் எடுத்து கடைசிவரை ஆட்டமிழக்காமல் இருந்தார். இதனால் 20 ஓவர்கள் முடிவில் லக்னோ அணி 6 விக்கெட்கள் இழப்பிற்கு 173 ரன்களை மட்டுமே எடுத்தது.
இதனால் ராஜஸ்தான் ராயல்ஸ் அணி 20 ரன்கள் வித்தியாசத்தில் வெற்றி பெற்றது. மேலும் இப்போட்டியில் ஆட்டநாயகன் விருது ராஜஸ்தான் அணியின் கேப்டன் சஞ்சு சாம்சனுக்கு வழங்கப்பட்டது.
