2024 ஐபிஎல் தொடரின் 16-வது போட்டியில் கொல்கத்தா நைட் ரைடர்ஸ் அணி 106 ரன்கள் வித்தியாசத்தில் டெல்லி கேபிட்டல்ஸ் அணியை வீழ்த்தியது.
இந்தியன் பிரீமியர் லீக்கின் 17-வது சீசன் மார்ச் 22 ஆம் தேதி தொடங்கியது. இதில் மொத்தம் 10 அணிகள் பங்குபெற்றுள்ளது.
இதில் சென்னை சூப்பர் கிங்ஸ், டெல்லி கேப்பிட்டல்ஸ், குஜராத் டைட்டன்ஸ்,கொல்கத்தா நைட் ரைடர்ஸ், லக்னோ சூப்பர் ஜெயண்ட்ஸ், மும்பை இந்தியன்ஸ், பஞ்சாப் கிங்ஸ், ராஜஸ்தான் ராயல்ஸ், ராயல் சேலஞ்சர்ஸ் பெங்களூரு, சன் ரைசர்ஸ் ஹைதராபாத் ஆகிய அணிகள் கலந்து கொண்டுள்ளன.
இந்த தொடரின் 16-வது போட்டி நேற்று மாலை 7.30 மணிக்கு விசாகப்பட்டினத்தில் நடைபெற்றது. இதில் டெல்லி கேபிட்டல்ஸ் மற்றும் கொல்கத்தா நைட் ரைடர்ஸ் அணிகள் விளையாடியது.
டாஸ் வென்ற கொல்கத்தா நைட் ரைடர்ஸ் அணி முதலில் பேட்டிங் தேர்வு செய்தது. அதன்படி முதலில் பேட்டிங் செய்த கொல்கத்தா நைட் ரைடர்ஸ் அணி 20 ஓவர்கள் முடிவில் 7 விக்கெட்கள் இழப்பிற்கு 272 ரன்களை எடுத்தது.
அதிகபட்சமாக சுனில் நரைன் 7 பௌண்டரீஸ், 7 சிக்சர்கள் என மொத்தம் 39 பந்துகளில் 85 ரன்களை எடுத்து 13 வது ஓவரில் மிச்சேல் மார்ஷ் பந்தில் ஆட்டமிழந்தார்.
அவரை தொடர்ந்து களமிறங்கிய அங்கிரிஷ் ரகுவன்ஷி 5 பௌண்டரீஸ் மற்றும் 3 சிக்சர்கள் என 27 பந்துகளில் 54 ரன்கள் எடுத்து ஆட்டமிழந்தார்.
பின்னர் களமிறங்கிய ஆன்ட்ரே ரசல் 4 பௌண்டரீஸ் மற்றும் 3 சிக்சர்கள் என மொத்தம் 41 ரன்கள் எடுத்த போது இஷாந்த் சர்மா வீசிய பந்தில் போல்ட் ஆகி ஆட்டமிழந்தார்.
தொடர்ந்து களமிறங்கிய ஸ்ரேயாஸ் ஐயர் 18 ரன்களிலும், ரிங்கு சிங் 26 ரன்களிலும் ஆட்டமிழக்க 20 ஓவர்கள் முடிவில் கொல்கத்தா நைட் ரைடர்ஸ் அணி 272 ரன்களை எடுத்தது.
இதைத்தொடர்ந்து 273 ரன்கள் எடுத்தால் வெற்றி என்ற மிக பெரிய இலக்குடன் களமிறங்கியது டெல்லி கேபிட்டல்ஸ் அணி.
டெல்லி கேபிட்டல்ஸ் அணியில் தொடக்க வீரர்களாக களமிறங்கிய டேவிட் வார்னர் 18 ரன்களிலும், ப்ரித்வி ஷாவ் 10 ரன்களிலும் ஆட்டமிழந்தனர்.
பின்னர் களமிறங்கிய மிச்சேல் மார்ஷ் மற்றும் அபிஷேக் டக் அவுட் ஆக‘ டெல்லி அணி 4 விக்கெட்கள் இழப்பிற்கு 33 ரன்களை மட்டுமே எடுத்து தவித்து வந்தது.
அப்போது களமிறங்கிய டெல்லி அணியின் கேப்டன் ரிஷப் பந்த் மற்றும் டிரிஸ்டன் ஸ்டப்ஸ் கூட்டணி சிறப்பாக செயல்பட்டு அணிக்கு நம்பிக்கை நட்சத்திரமாக விளங்கியது.
இதில் ரிஷப் பந்த் 4 பௌண்டரீஸ் மற்றும் 5 சிக்சர்கள் என மொத்தமாக 55 ரன்களை எடுத்து ஆட்டமிழக்க டிரிஸ்டன் ஸ்டப்ஸ் 4 பௌண்டரீஸ் மற்றும் 4 சிக்சர்கள் என 54 ரன்கள் எடுத்து ஆட்டமிழந்தார்.
பின்னர் களமிறங்கிய வீரர்கள் சொற்ப ரன்களில் ஆட்டமிழக்க டெல்லி கேபிட்டல்ஸ் அணி 17.2 ஓவர்களில் அனைத்து விக்கெட்களையும் இழந்து 166 ரன்களை எடுத்தது.
கொல்கத்தா நைட் ரைடர்ஸ் அணியில் அதிகபட்சமாக வருண் சக்ரவர்த்தி மற்றும் வைபவ் தலா 3 விக்கெட்களை வீழ்த்தினர். மிச்சேல் ஸ்டார்க் 2 விக்கெட்களை வீழ்த்தினர். ரசல் மற்றும் சுனில் நரேன் தலா 1 விக்கெட்டை வீழ்த்தினர்.
இதனால் கொல்கத்தா நைட் ரைடர்ஸ் அணி 106 ரன்கள் வித்தியாசத்தில் வெற்றி பெற்று இந்த தொடரின் தனது மூன்றாவது வெற்றியை பதிவு செய்தது. மேலும் இந்த போட்டியில் கொல்கத்தா வீரர் சுனில் நரேனுக்கு ஆட்டநாயகன் விருது வழங்கப்பட்டது.
