எம்ஜிஆர் கழகத்தின் நிறுவனரும் தமிழ்நாட்டின் முதுபெரும் அரசியல் தலைவர்களில் ஒருவருமான முன்னாள் அமைச்சர் ஆர்.எம்.வீரப்பன் (வயது 98) முதுமையால் காலமானார்.
புதுக்கோட்டையில் பிறந்த இவர், எம்.ஜி.ஆர்., அமைச்சரவையிலும், ஜெயலலிதா அமைச்சரவையிலும் அமைச்சராக இடம்பெற்று இருந்தார். கே.ஆர்.ஆர்., நாடகக் கம்பெனியில் கணக்கு பிள்ளையாக பணியாற்றினார். பின்னர் எம்ஜிஆர் அண்ணன் சக்கரபாணி, எம்.ஜி.ஆர் ஆகியோரின் நம்பிக்கைக்கு பாத்திரமாகினார். எம்.ஜி.ஆர்., பிக்சர்ஸ் மேலாளராக இருந்தார். சத்யா மூவீஸ் பட நிறுவன அதிபராகவும் இருந்தார். எம்ஜிஆர், சிவாஜி, ரஜினி, கமல் நடித்த படங்களை தயாரித்துள்ளார்.
எம்ஜிஆர், அண்ணா திமுக தொடங்கிய போது அவரது வலதுகரமாக அக்கட்சியில் இருந்தவர் ஆர்.எம்.வீரப்பன், தமிழ்நாடு சட்டசபையில் எம்.எல்.ஏ.வாக, எம்.எல்.சியாக பதவி வகித்தார். எம்ஜிஆர் முதல்வராக இருந்த போது அவரது அமைச்சரவையில் சக்திவாய்ந்தவராக இருந்தார்.
எம்ஜிஆர் மறைவுக்குப் பின் ஜானகி அணியிலும் பின்னர் ஜெயலலிதா தலைமையில் ஒருங்கிணைந்த அண்ணா திமுகவிலும் பணியாற்றினார். ஜெயலலிதா முதல்வராக பதவி வகித்த போது அவரது அமைச்சரவையிலும் இடம் பெற்றிருந்தார் ஆர்.எம்.வீரப்பன்.
அ.தி.மு.க.,வில் இருந்து நீக்கப்பட்ட பிறகு 1995ல் எம்.ஜி.ஆர்., கழகம் என்ற பெயரில் கட்சி துவக்கி ஆர்.எம்.வீரப்பன் நடத்தி வந்தார். வயது மூப்பு காரணமாக ஆர்.எம்.வீரப்பன் சில நாட்களாக உடல்நலக்குறைவால் சென்னை அப்போலோ மருத்துவமனையில் தீவிர சிகிச்சை பெற்று வந்தார். இன்று அவர் சிகிச்சை பலனின்றி காலமானார்.
