தென்னிந்திய பகுதிகளின் மேல் நிலவிவரும் வளிமண்டல மேலடுக்கு சுழற்சி காரணமாக தமிழகத்தின் பல்வேறு பகுதிகளில் கன முதல் அதிகன மழை பெய்துள்ளது.
கரூர் மாநகராட்சிக்கு உட்பட்ட ஜவஹர் பஜார், தான்தோன்றி மலை, வெண்ணமலை, வெள்ளியணை உள்ளிட்ட பகுதிகளில் கருமேகம் சூழ்ந்து குளிர்காற்றுடன் கனமழை பெய்தது. வெயில் தாக்கம் அதிகமாக இருந்த நிலையில் திடீரென பெய்த இந்த மழையால் அப்பகுதி மக்கள் மகிழ்ச்சியடைந்துள்ளனர்.
இந்நிலையில் தாழ்வான பகுதிகளில் மழை நீருடன் கழிவு நீர் செல்வதால் வாகன ஓட்டிகள் மற்றும் பொதுமக்கள் அவதிக்குள்ளாகினர்.
இதே போல, திருச்சியில் ஸ்ரீரங்கம், மாம்பழச்சாலை, அண்ணா சிலை, தில்லை நகர், உறையூர் உள்ளிட்ட பல பகுதிகளில் மிதமானது முதல் கனமழை கொட்டி தீர்த்தது.
இந்த மழையின் காரணமாக சாலைகளில் கழிவுநீருடன் மழை நீர் கலந்து வெள்ளம்போல பெருக்கெடுத்து ஓடியது. இதனால் வாகன ஓட்டிகள் மற்றும் பொதுமக்கள் மிகுந்த சிரமமடைந்தனர்.
உதகை, குன்னூர் கோத்தகிரி மற்றும் அதன் சுற்றுவட்டார பகுதி என அனைத்து இடங்களிலும் கனமழை பெய்த நிலையில், நீர் ஓடைகள் மற்றும் ஆறுகளில் தண்ணீர் பெருக்கெடுத்து ஓடுகிறது.
கனமழை காரணமாக கேத்தி பாலாடா, கூக்கல்தொரை, மசக்கல் பகுதியில் பயிரிடப்பட்ட கேரட், வெள்ளை பூண்டு, பீட்ரூட் உள்ளிட்ட மலைக் காய்கறி பயிர்கள் அனைத்தும் வெள்ள நீரில் மூழ்கியதால் விவசாயிகள் கவலை அடைந்துள்ளனர்.
நாகர்கோவில், தக்கலை, அழகியமண்டபம், மேக்காமண்டபம், மார்தாண்டம் மற்றும் அதன் சுற்றுவட்டார பகுதியில் இடைவிடாது மழையால் குளிர்ச்சியான சூழல் நிலவுகிறது.
திருப்பத்தூர் மாவட்டம் ஆம்பூர் மற்றும் சுற்றுவட்டார பகுதிகளில் கன மழை கொட்டித் தீர்த்தது. இதனால் ரெட்டிதோப்பு ரயில்வே மேம்பாலப் பகுதியில் மழைநீர் தேங்கியதால் வாகன ஓட்டிகள் கடும் சிரமத்திற்கு ஆளாகினர்.
