அரசியல் மாநாடு போல் சென்னை போரூரில் நடிகர் சிவகார்த்திகேயனின் நற்பணி இயக்க நிர்வாகிகள் சந்திப்பு விழா பிரம்மாண்டமாக நடைபெற்றது.
சிவகார்த்திகேயன் நற்பணி இயக்கம் மூலம் ரத்ததானம், கல்வி உதவி மற்றும் ஏழை எளியோருக்கு நலத்திட்ட உதவிகள் வழங்கப்பட்டு வருகின்றன. இந்நிலையில் தமிழகத்தில் உள்ள அனைத்து நற்பணி இயக்க நிர்வாகிகளையும் சந்திக்க சிவகார்த்திகேயன் முடிவு செய்தார்.
அதன்படி, சென்னை போரூரில் நற்பணி இயக்க நிர்வாகிகள் சந்திப்பு விழா ஏற்பாடு செய்யப்பட்டது. இந்த விழா மேடை உள்ளிட்ட விஷயங்கள் அரசியல் மாநாடு போல் பிரமாண்டமாக காட்சியளித்தன. கிட்டத்தட்ட 2 ஆயிரம் நிர்வாகிகள் வெள்ளை சட்டை அணிந்து, தொண்டர்கள் போல் கூட்டமாக பங்கேற்றனர்.
நிகழ்ச்சியில் பேசிய நடிகர் சிவகார்த்திகேயன், மிமிக்கிரி, தொகுப்பாளர் பணிகளை செய்து கொண்டிருந்த என்னை மக்கள் நடிகனாக உயர்த்தி இந்த இடத்தில் அமர வைத்திருக்கிறார்கள் அவர்களுக்கு நான் ஏதாவது செய்ய வேண்டும் என்றார். சினிமா பின்புலம் ஏதும் இல்லாமல் நானும், விஜய் சேதுபதியும் வந்துள்ளதாகவும் நமது ரசிகர்களும், நிர்வாகிகளும் கட்டுப்பாடு, கட்டமைப்பாக உள்ளனர் என்றும் கூறினார்.
