என்டிஏ எம்.பி-க்கள் குழு தலைவராக பிரதமர் மோடி தேர்வு!

தேசிய ஜனநாயக கூட்டணி எம்பிக்கள் குழு தலைவராக பிரதமர் மோடி ஒருமனதாக தேர்வு செய்யப்பட்டார்.

நாடாளுமன்ற தேர்தல் 7 கட்டங்களாக நடைபெற்றது. ஆட்சி அமைக்க 272 இடங்கள் தேவை என்ற நிலையில், தேசிய ஜனநாயக கூட்டணி 293 இடங்களை பெற்றது. இதனைத்தொடர்ந்து நடைபெற்ற கூட்டத்தில் தேசிய ஜனநாயக கூட்டணியின் தலைவராக பிரதமர் மோடி ஒரு மனதாக தேர்வு செய்யப்பட்டார்.

இந்நிலையில், டெல்லியில் உள்ள பழைய நாடாளுமன்ற கட்டிடத்தில் தேசிய ஜனநாயக எம்பிக்கள் கூட்டம் இன்று நடைபெற்றது. இதில் பாஜக தேசிய தலைவர் ஜெ.பி.நட்டா, உள்துறை அமைச்சர் அமித் ஷா, ராஜ்நாத்சிங், தெலுங்கு தேச கட்சி தலைவர் சந்திரபாபு நாயுடு, பீகார் முதல்வர் நிதிஷ் குமார் உள்ளிட்டோர் பங்கேற்றனர்.

தமிழக பாஜக மாநில தலைவர் அண்ணாமலை, மத்திய இணை அமைச்சர் எல்.முருகன், முன்னாள் முதலமைச்சர் ஓ.பன்னீர் செல்வம், தமிழ் மாநில காங்கிரஸ் தலைவர் ஜி.கே.வாசன், அமமுக பொதுச்செயலாளர் டிடிவி தினகரன், ஏசி.சண்முகம் உள்ளிட்டோர் கலந்து கொண்டனர்.

இந்த கூட்டத்தில் பங்கேற்க வந்த மோடிக்கு எம்பிக்கள் மற்றும் தலைவர்கள் எழுந்து நின்று கைதட்டி உற்சாக வரவேற்பு அளித்தனர். அரசியல் சாசன புத்தகத்தை வணங்கிய பின்னர் பிரதமர் மோடி மேடைக்கு சென்றார்.

இதனைத்தொடர்ந்து தேசிய ஜனநாயக கூட்டணி எம்பிக்கள் குழு தலைவராக பிரதமர் மோடியை மத்திய அமைச்சர் ராஜ்நாத் சிங் முன்மொழிந்தார். மத்திய அமைச்சர் அமித் ஷா, குமாரசாமி, சந்திரபாபு நாயுடு. நிதிஷ் குமார் உள்ளிட்ட தலைவர்கள் வழிமொழிந்து பேசினர்.

இதனையடுத்து தேசிய ஜனநாயக கூட்டணி எம்பிக்கள் குழு தலைவராக பிரதமர் மோடி ஒரு மனதாக தேர்வு செய்யப்பட்டார்.

அப்போது எம்பிக்கள் மோடி, மோடி என உற்சாக குரல் எழுப்பி தங்கள் மகிழ்ச்சியை வெளிப்படுத்தினர் பின்னர் பிரதமர் மோடிக்கு கூட்டணி கட்சி தலைவர்கள் பூங்கொத்து கொடுத்து வாழ்த்து தெரிவித்தனர்.

தெலுங்கு தேச தலைவர் சந்திரபாபு நாயுடு மற்றும் பவன் கல்யாண் ஆகிய இருவரும் பிரதமர் மோடிக்கு திருப்பதி வெங்கடாஜலபதி படத்தை பரிசாக வழங்கினார்.