தமிழ்நாட்டின் பல்வேறு பகுதிகளில் பெய்த கனமழையால் வெப்பம் தணிந்து குளிர்ச்சியான சூழல் நிலவியது.
தேனி மாவட்டம் சின்னமனூர் மற்றும் சுற்றுவட்டார பகுதிகளில் ஒரு மணி நேரத்திற்கும் மேலாக கனமழை பெய்தது. வங்ககடலில் நிலவும் வளிமண்டல கீழடுக்கு சுழற்சி காரணமாக தமிழகத்தின் பல்வேறு மாவட்டங்களில் அவ்வப்போது மழை பெய்து வருகிறது.
அந்த வகையில் தேனி மாவட்டத்திலுள்ள சின்னமனூர், நாயக்கனூர் உள்ளிட்ட 10க்கும் மேற்பட்ட கிராமப் பகுதிகளில் ஒரு மணி நேரத்திற்கும் மேலாக கனமழை பெய்தது.
இதன் காரணமாக தற்போது விளைவிக்கப்பட்ட மானாவாரி பயிர்களுக்கு போதிய அளவு நீர் கிடைக்கும் என விவசாயிகள் நம்பிக்கை தெரிவித்துள்ளனர்.
வேலூரில் காலை முதல் வெயில் வாட்டி வதைத்த நிலையில், மாலை ஒரு மணி நேரத்திற்கும் மேலாக கனமழை பெய்தது. இந்த மழை காரணமாக வெப்பம் தணிந்து குளிர்ச்சியான சூழல் நிலவியதால் பொதுமக்கள் மகிழ்ச்சியடைந்தனர்.
அதேபோல் காஞ்சிபரம் மாவட்டம் ஸ்ரீபெரும்புதூர் மற்றும் சுற்றுவட்டார பகுதிகளில் ஒரு மணி நேரத்திற்கும் மேலாக கனமழை பெய்தது.
தொழிற்சாலைகள் நிறைந்த இந்த பகுதியில் கடந்த சில தினங்களாக வெயில் வாட்டி வதைத்த நிலையில், திடீரென மழை பெய்ததால் குளிர்ச்சியான சூழல் நிலவியது.
