ரவுடிகளுக்கு அவர்கள் மொழியில் பாடம் கற்பிக்கப்படும் என்பதின் அர்த்தம் குறித்து நேரில் ஆஜராகி விளக்கம் அளிக்க, சென்னை மாநகர காவல் ஆணையருக்கு, மாநில மனித உரிமைகள் ஆணையம் உத்தரவிட்டுள்ளது.
திருவொற்றியூரை சுற்றியுள்ள பகுதிகளில் வசிக்கும் சரித்திர பதிவேடு ரவுடிகளின் வீடுகளுக்கு, காவல் உதவி ஆணையர் இளங்கோவன் தலைமையிலான போலீசார் சென்று, அவர்களின் குடும்பத்தினரை சந்தித்து ஒழுக்கமாக இருக்க வேண்டும், இல்லை என்றால் என்கவுன்ட்டர் செய்யப்பட வாய்ப்புள்ளதாக கூறிய காட்சி யூடியூப் சேனல் ஒன்றில் வெளியானது.
இதனடிப்படையில் தாமாக முன்வந்து வழக்காக எடுத்து, மனித உரிமைகள் ஆணைய தலைவர் நீதிபதி மணிக்குமார், உறுப்பினர் கண்ணதாசன் அமர்வு விசாரணை நடத்தியது.
அப்போது ஆஜரான உதவி ஆணையர் இளங்கோவன், சென்னை மாநகர காவல் ஆணையர் உத்தரவின்பேரில் எச்சரிக்கை விடுத்ததாக கூறினார்.
அப்போது குறுக்கிட்ட ஆணைய தலைவர் நீதிபதி மணிக்குமார், ரவுடிகளுக்கு அவர்கள் மொழியில் பாடம் கற்பிக்கப்படும் என்பதின் அர்த்தம் என்ன எனக் கேள்வி எழுப்பினார்.
அதற்கு தெரியாது என உதவி ஆணையர் பதில் அளித்ததால், சென்னை மாநகர காவல் ஆணையர் அருண், வரும் 14ஆம் தேதி நேரில் ஆஜராகி விளக்கம் அளிக்க உத்தரவிட்டார்.
