திருவொற்றியூர் தனியார் பள்ளியில் வாயு கசிவு காரணமாக மாணவிகள் மீண்டும் மயங்கி விழுந்ததால் பெற்றோர்கள் அச்சமடைந்தனர்.
சென்னை திருவொற்றியூரில் வாயு கசிவு காரணமாக, கடந்த 10 நாட்களுக்கு முன்பு அங்குள்ள தனியார் பள்ளி மூடப்பட்டது. இந்நிலையில், தனியார் பள்ளி இன்று மீண்டும் திறக்கப்பட்ட நிலையில், மூச்சு திணறல் ஏற்பட்டு 6 மாணவிகள் மீண்டும் மயங்கி விழுந்தனர்.
அவர்களுக்கு மருத்துவமனையில் தீவிர சிகிச்சை அளிக்கப்படுகிறது. இதுகுறித்து தகவல் அறிந்த வந்த பெற்றோர், அலட்சியமாக செயல்படும் பள்ளி நிர்வாகத்தை முற்றுகையிட்டு கடும் வாக்குவாதத்தில் ஈடுபட்டனர்.
தகவல் அறிந்து சம்பவ இடத்திற்கு சென்ற அதிகாரிகள் மற்றும் போலீசார், பள்ளி வளாகத்தில் வாயு கசிவு தொடர்பாக ஆய்வு மேற்கொண்டனர். அப்போது, தனியார் பள்ளியை மூட பெற்றோர் சார்பில் கோரிக்கை விடுக்கப்பட்டது. இதையடுத்து, எம்.எல்.ஏ மற்றும் போலீசார் அறிவுறுத்தலின்பேரில் தனியார் பள்ளி தற்காலிகமாக மூடப்பட்டது.
