மதுரை டங்ஸ்டன் ஏல உரிமை ரத்து செய்த நிலையில், அப்பகுதி விவசாயிகள் மற்றும் பொது மக்கள் அமமுக பொதுச் செயலாளர் டிடிவி தினகரனுக்கு நேரில் நன்றி தெரிவித்தனர்.
மதுரை மாவட்டம், அரிட்டாபட்டி டங்ஸ்டன் சுரங்க திட்டத்தை ரத்து செய்யவேண்டும் என்று அப்பகுதி பொது மக்கள் போராட்டத்தை சுட்டிக்காட்டி, பாஜக மாநிலத் தலைவர் அண்ணாமலை மற்றும் அமமுக பொதுச் செயலாளர் டிடிவி தினகரன் உள்ளிட்டோர் வலியுறுத்தி வந்தனர்.
மேலும், இது தொடர்பாக, டெல்லியில் மத்திய சுரங்கத்துறை அமைச்சர் கிஷன் ரெட்டியிடம் பாஜக சார்பில் முறையிடப்பட்டது. இதனையடுத்து, அத்திட்டத்தை மத்திய அரசு ரத்து செய்து உத்தரவிட்டது.
இந்நிலையில், அரிட்டாபட்டி விவசாயிகள், சென்னை அடையாறில் உள்ள டிடிவி தினகரன் இல்லத்திற்கு நேரில் சென்று நன்றி தெரிவித்தனர். பின்னர், செய்தியாளர்களிடம் பேசிய அரிட்டாபட்டி மக்கள், டங்ஸ்டன் ஏல உரிமையை ரத்து செய்த மத்திய அரசுக்கும், உறுதுணையாக இருந்த அமமுக பொதுச் செயலாளர் டிடிவி தினகரன் உள்ளிட்டோருக்கும் நன்றி தெரிவித்தனர்.
