எடை குறைப்பு மருந்தான semaglutide செமக்ளுடைடு, மாரடைப்பு மற்றும் பக்கவாதம் ஏற்படும் அபாயத்தைக் குறைக்கிறது என்றும், இதய ஆரோக்கியத்துக்கு உதவுகிறது என்று ஒரு புதிய ஆய்வில் தெரிய வந்துள்ளது. அதுபற்றிய ஒரு செய்தி தொகுப்பு.
(The Lancet) தி லான்செட் மருத்துவ இதழ் வெளியிட்டுள்ள ஆய்வறிக்கையில், (semaglutide) செமக்ளுடைடு போன்ற உடல் பருமனுக்கான மருந்துகள் எடை குறைப்பைத் தாண்டிய ஆரோக்கிய நன்மைகளை வழங்கிறது என்று தெரிவித்துள்ளது.
எடை இழப்பு மருந்துகளில் உள்ள மூலப்பொருளான செமக்ளுடைடு விளைவுகள்குறித்து செய்யப்பட்ட ஆய்வில், இந்த மருந்தை எடுத்துக் கொள்ளும் நபர்களுக்கு மாரடைப்பு அல்லது பக்கவாதம் உள்ளிட்ட உடல் நோய்கள் ஏற்படுகிறதா என்று ஆராயப்பட்டது.
ஏற்கனவே இருதய நோயால் பாதிக்கப்பட்ட உடல் பருமன் உள்ள 45 வயது மற்றும் அதற்கு மேற்பட்ட 17,604 பேரிடம் இந்த ஆய்வு நடத்தப் பட்டது. 41 நாடுகளில் நடத்தப்பட்ட இந்த ஆய்வில், பங்குபெற்ற நபர்களில் பாதி பேருக்குச் செமக்ளுடைடு கொடுக்கப்பட்டதாகவும், மீதிப் பேருக்குப் போலியான மருந்து கொடுக்கப்பட்டதாகவும் கூறப்படுகிறது.
இந்த ஆய்வில், செமக்ளூடைடை எடுத்துக் கொண்டவர்களில் மாரடைப்பு மற்றும் பக்கவாதம் போன்ற பாதிப்புக்கள் 20 சதவீதம் குறைந்திருப்பதாகக் கண்டறியப்பட்டுள்ளது. மேலும், சிகிச்சையின் போது எவ்வளவு எடை இழந்தாலும், இதய ஆரோக்கியம் காணப்படுவதாக ஆராய்ச்சியாளர்கள் தெரிவித்துள்ளனர்.
சிகிச்சையின் முதல் நான்கு மாதங்களில் இழந்த எடையின் அளவைப் பொருட்படுத்தாமல் செமக்ளூடைட் உடல்நலத்தைப் பேணுகிறது என்றும் கண்டறியப் பட்டுள்ளன. குறிப்பாக, இடுப்பு சுற்றளவு குறைப்புக்கும் இதயப் பாதுகாப்புக்கும் இடையிலான தொடர்பை ஆராய்ச்சியாளர்கள் ககண்டுபிடித்துள்ளனர்.
33 சதவீதம் இடுப்பு சுற்றளவு குறைப்பதன் மூலம், மாரடைப்பு வராமல் தடுக்க முடிகிறது என்று கூறப்பட்டுள்ளது. இடுப்பு சுற்றளவை குறைப்புக்கும் இதய நன்மைக்கும் இடையிலான தொடர்பை ஆராய்வது நல்லது என்று கூறியுள்ள பேராசிரியர் (John Deanfield) ஜான் டீன்ஃபீல்ட், ஒட்டுமொத்த எடையைவிட வயிற்றுப் பகுதியில் உள்ள கொழுப்பு இதய ஆரோக்கியத்துக்கு மிகவும் ஆபத்தானது என்று கூறியுள்ளார்.
கூடுதலாக, இதயத்துக்கான நன்மைகள் தருவது என்பது எடை இழப்பு அளவுடன் நேரடியாகத் தொடர்புடையவை அல்ல என்றும், உண்மையில் இந்த மருந்து இதய நோய் மற்றும் முதுமை காரணமாக வரும் பக்கவாதம் போன்ற பிற நோய்களையும் நேரடியாகப் பாதிக்கும் என்றும் கூறியுள்ளார்.
இந்த ஆய்வின் முடிவுகள் எடை இழப்பு ஊசி என்று பெயரிடப்பட்டுள்ள semaglutide மருந்தின் செயல்பாடுகள் என்ன என்பதைத் தெளிவாகக் காட்டியுள்ளன.
ஆனாலும், இந்த மருந்தை எடுத்துக் கொள்ளும்போது அதன் பக்க விளைவுகளையும் கவனத்தில் எடுத்துக் கொள்ள வேண்டும் என்றும் அறிவுறுத்தப் பட்டுள்ளது.
