சவுத் இந்தியன் பாதுகாப்புத்துறை சப்ளையர்ஸ் மற்றும் ஸ்டார்ட் அப் அசோசியேஷன் சார்பில் ராணுவத் துறையில் உள்ள தொழில் வாய்ப்புகளை சிறு, குறு தொழில் நிறுவனங்கள் பெறுவதற்கான கண்காட்சி கோவையில் தொடங்கியது. இது குறித்த செய்தி தொகுப்பை தற்போது காணலாம்.
பிரதமர் நரேந்திர மோடியால் துவங்கப்பட்ட தற்சார்பு இந்தியா திட்டம் நாடு முழுவதும் பெரும் வரவேற்பை பெற்றுள்ளது. அதற்கு வலுவூட்டும் விதமாக, தென்னிந்திய பாதுகாப்பு தளவாட உபகரண விநியோகஸ்தர்கள் மற்றும் ஸ்டார்ட் அப் சங்கம் சார்பில் கோவை ரத்தனம் கிராண்ட் ஹாலில் மூன்று நாள் கண்காட்சி துவங்கியது…
பாதுகாப்புத்துறை சார்ந்து அரசு, பொதுத்துறை நிறுவனங்கள், ஸ்டார்ட் அப் நிறுவனங்கள் சார்பில் 100 ஸ்டால்கள் அமைக்கப்பட்டுள்ளன. முப்படைகளுக்கு தேவையான பாதுகாப்பு தளவாடங்கள் கண்காட்சியில் காட்சிப்படுத்தப்பட்டுள்ளன.
பாதுகாப்புத் துறைக்கு பல்வேறு தளவாடங்களை உற்பத்தி செய்து தரும் நிறுவனங்கள்,HAL, பாரத் எர்த்மூவர்ஸ், தனியார் மற்றும் பொதுத்துறை கப்பல் கட்டும் நிறுவனங்கள் உள்ளிட்டவை தங்களுக்குத் தேவையான உபகரணங்களைக் காட்சிப்படுத்தியுள்ளன. இந்நிறுவனங்கள், தங்களுக்குத் தேவையான உபகரணங்களுக்கான ஆர்டர்களைப் பெறுவது, டெண்டரில் பங்கேற்பது, ஜெம் போர்டல் பதிவு, சான்றிதழ்களைப் பெறுவது, தரம் என அனைத்து வகையான உதவிகளையும் ஸ்டால்களிலேயே வழங்குகின்றன.
இந்திய பாதுகாப்புத்துறைக்கு 3 லட்சம் கோடி ரூபாய் நிதி ஒதுக்கப்படும் நிலையில் இதுபோன்ற கண்காட்சி, அதிநவீன உள்நாட்டு பாதுகாப்பு உபகரணங்களை ராணுவத்தில் இணைக்கவும், பலப்படுத்தவும் உதவும் என்கிறார் முன்னாள் ராணுவ வீரரும் மேஜருமான மதன்குமார்.
உலகம் முழுவதும் ட்ரோன் தாக்குதல் யுக்தி பிரபலமடைந்து வரும் நிலையில், இந்தியாவில் ட்ரோன் தயாரிப்பு நிறுவனங்கள் புதிய பாய்ச்சலில் முன்னேறி வருகின்றன. 26 வயதான ஆதர்ஸ் என்பவர் தனது ட்ரோன் நிறுவனம் குறித்து பேசியதோடு, ஆத்ம நிர்பார் பாரத் திட்டத்தின் மூலம் இன்னும் பல நிறுவனங்கள் ட்ரோன் தயாரிப்பில் ஈடுபட வேண்டும் என்கிறார்….
ராணுவ தளவாட உற்பத்தி மையங்களில் ஒன்றாக கோவையை மத்திய அரசு அறிவித்துள்ள நிலையில், இந்த கண்காட்சி கோவையில் நடைபெறுவது மிகவும் பொருத்தமாக இருப்பதாக பாஜக எம்எல்ஏ வானதி ஸ்ரீனிவாசன் தெரிவித்துள்ளார்.
“தற்சார்பு இந்தியா” திட்டம், உள்நாட்டு உற்பத்தி, உள்ளூர் வணிகங்கள் மற்றும் பொருளாதாரத்தை மேம்படுத்துவதை நோக்கமாகக் கொண்டுள்ளது. இந்த திட்டத்தை தொழில் நிறுவனங்கள் எளிதாக அணுக இது போன்ற கண்காட்சி பெரிய அளவில் உதவும் என்கின்றனர் கண்காட்சி ஒருங்கிணைப்பாளர்கள்…
