போலி ஆவணங்களை கொண்டு சிம் கார்டு பெற்றால் 3 ஆண்டுகள் வரை சிறை தண்டனையும், 50 லட்சம் ரூபாய் வரை அபராதமும் விதிக்கப்படும் என்று மத்திய தொலைத்தொடர்பு துறை எச்சரித்துள்ளது.
சத்தீஸ்கரில் ஒரு சிம் கார்டு விற்பனை முகவர், பொதுமக்களின் அடையாள ஆவணங்களை அவர்களின் அனுமதியின்றி பயன்படுத்தி சட்ட விரோதமாக 25 சிம் கார்டுகளை பெற்றுள்ளார்.
அந்த முகவர் கருப்புப் பட்டியலில் சேர்க்கப்பட்டு, சிம் கார்டுகளை அவர் விற்கவும் தடை விதிக்கப்பட்டது. இதையடுத்து, மத்திய தொலைத்தொடர்பு துறையானது ஒரு முக்கிய எச்சரிக்கை அறிவிப்பை வெளியிட்டிருக்கிறது. அதன்படி, 2023ஆம் ஆண்டு தொலைத்தொடர்பு சட்டத்தின்கீழ் இத்தகைய மோசடியில் ஈடுபடுவோருக்கு 3 ஆண்டுகள் சிறை தண்டனையும், 50 லட்சம் ரூபாய் அபராதமும் விதிக்கப்படும் என்று எச்சரிக்கப்பட்டுள்ளது.
பொதுமக்கள் தங்கள் அடையாளத்துடன் இணைக்கப்பட்டுள்ள அனைத்து மொபைல் எண்களையும், சஞ்சார் சாத்தி இணையதளம் அல்லது மொபைல் செயலி வழியாக தவறாமல் சரிபார்க்குமாறும் தொலைத்தொடர்பு துறை அறிவுறுத்தி உள்ளது.
