மேகதாது அணை கட்ட கர்நாடக அரசின் திட்டத்திற்கு எதிராக தமிழக சட்டப்பேரவையில் நிறைவேற்றப்பட்ட தீர்மானத்தை எதிர்த்து, அதிமுக கொறடா அக்ரி கிருஷ்ணமூர்த்தி தொடர்ந்த வழக்கை சென்னை உயர்நீதிமன்றம் தள்ளுபடி செய்து உத்தரவிட்டுள்ளது.
மேகதாது அணை விவகாரம் தொடர்பாக நடுவர் மன்றம் அமைக்க வேண்டும் என கடந்த ஜூன் 19ஆம் தேதி சட்டப்பேரவையில் தீர்மானம் நிறைவேற்றப்பட்டது.
சட்டத் திருத்தத்தை எதிர்த்து அதிமுக கொறடா அக்ரி கிருஷ்ணமூர்த்தி சென்னை உயர்நீதிமன்றத்தில் வழக்கு தொடர்ந்தார்.
இந்த வழக்கு தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி.அருள்முருகன் அமர்வில் விசாரணைக்கு வந்தது.
அப்போது மனுதாரர் தரப்பில், சட்டத்திருத்தம் குறித்து முறையாக விவாதிக்காமல் தீர்மானம் நிறைவேற்றப்பட்டதாகவும்,
திருத்தம் ஒருமனதாக ஏற்கப்படவில்லை எனவும் வாதிடப்பட்டது.
இதற்கு தமிழக அரசு தரப்பில், சட்டப்பேரவை நடவடிக்கைகளின் வீடியோ காட்சிகளை நீதிமன்றத்தில் தாக்கல் செய்யப்பட்டது.
முதலமைச்சரின் கோரிக்கையை ஏற்று சபாநாயகர் திருத்தத்தை வாக்கெடுப்புக்கு விட்டதாகவும்,
அப்போது யாரும் எதிர்ப்பு தெரிவிக்கவில்லை எனவும் அரசு தரப்பில் தெரிவிக்கப்பட்டது.
இதனை தொடர்ந்து வழக்கை விசாரித்த நீதிபதிகள், அக்ரி கிருஷ்ணமூர்த்தியின் மனுவை தள்ளுபடி செய்து உத்தரவிட்டனர்.
