பாலியல் வன்கொடுமை வழக்கில் கைது செய்யப்பட்டுள்ள ஜெம் வீரமணியின் நீதிமன்ற காவலை மேலும் 14 நாட்கள் நீட்டித்து, சென்னை போக்சோ சிறப்பு நீதிமன்றம் உத்தரவிட்டுள்ளது.
சிறுமிகளை பாலியல் வன்கொடுமை செய்த வழக்கில் ஜெம் வீரமணி கைது செய்யப்பட்டு சிறையில் அடைக்கப்பட்டுள்ளார்.
அவரது நீதிமன்றக் காவல் நிறைவடைந்த நிலையில், சென்னை போக்சோ சிறப்பு நீதிமன்ற நீதிபதி எஸ்.பத்மா முன்பு, சிறையில் இருந்தவாறு காணொலி மூலம் ஆஜர்படுத்தப்பட்டார்.
அப்போது, சிறப்பு புலனாய்வுக்குழு அமைக்கப்பட்டு விசாரணை நடைபெற்று வருவதால், வீரமணியின் நீதிமன்ற காவலை நீட்டிக்க வேண்டுமென காவல்துறை தரப்பில் தெரிவிக்கப்பட்டது.
இதையடுத்து, வீரமணியின் நீதிமன்ற காவலை மேலும் 14 நாட்களுக்கு நீட்டித்து நீதிபதி உத்தரவிட்டார்.
மேலும், நீதிமன்ற காவல் முடிந்து வரும் அக்டோபர் 9-ம் தேதி நீதிமன்றத்தில் வீரமணியை மீண்டும் ஆஜர்படுத்த காவல்துறைக்கு உத்தரவிட்டு, விசாரணையை அன்றைய தினத்திற்கு நீதிபதி தள்ளிவைத்தார்.
