செங்கல்பட்டு அருகே தனியார் கல்லூரியில் நடந்த விருதுகள் வழங்கும் விழாவில் பங்கேற்ற சபாநாயகர் ஜே.சி.டி.பிரபாகர், தனது கடந்தகால நிகழ்வு ஒன்றை பகிர்ந்து கண் கலங்கினார்.
தாம்பரம் அடுத்த மண்ணிவாக்கத்தில் உள்ள தனியார் கல்லூரியில், ஆசிரியர் தினத்தை முன்னிட்டு “பெரி பெருமை விருதுகள்” வழங்கும் விழா நடைபெற்றது. இதில் சபாநாயகர் ஜே.சி.டி. பிரபாகர் சிறப்பு விருந்தினராக கலந்து கொண்டு, அரசு மற்றும் தனியார் பள்ளிகளைச் சேர்ந்த 200-க்கும் மேற்பட்ட ஆசிரியர்களுக்கு விருதுகளை வழங்கி கவுரவித்தார்.
அதனைத் தொடர்ந்து நிகழ்ச்சியில் பேசிய அவர், தனது கடந்த காலத்தில் தான் சிலருடன் இணைந்து ஒரு பொறியியல் கல்லூரியை தொடங்கியபோது, கட்டணம் செலுத்த அவகாசம் கேட்ட மாணவனை, தாலியை அடமானம் வைத்து கட்டணத்தை செலுத்துங்கள் என நிர்வாகம் கூறியதாக தெரிவித்தார். இந்த சம்பவம் தன்னை பெரிதும் பாதித்ததாகவும், இதனால், அந்த கல்லூரியிலிருந்தே தான் விலகியதாகவும் கூறி மேடையில் கண் கலங்கினார்.
