ஆசிய விளையாட்டு கபடி போட்டியில் இந்திய மகளிர் அணியை தொடர்ந்து ஆடவர் அணியும் தங்கப் பதக்கம் வென்று வரலாற்று சாதனை படைத்துள்ளது.
ஜப்பானில் நடைபெற்று வரும் ஆசிய விளையாட்டுப் போட்டிகளில், மகளிர் கபடி இறுதிப் போட்டியில் இந்தியாவும், ஈரானும் மோதின. விறுவிறுப்பாக நடந்த போட்டியில் இந்திய அணி தொடர்ந்து ஆதிக்கம் செலுத்தி வந்தது. இறுதியில் 37க்கு 34 என்ற புள்ளிக் கணக்கில் ஈரானை வீழ்த்தி தங்கப் பதக்கத்தை கைப்பற்றியது. வெற்றி பெற்றதும் இந்திய வீராங்கனைகள் தேசியக் கொடியை ஏந்திக்கொண்டு வலம் வந்து மகிழ்ச்சியை வெளிப்படுத்தினர்.
இதனைத் தொடர்ந்து நடைபெற்ற ஆடவர் கபடி இறுதிப் போட்டியிலும் ஈரான் அணியை இந்தியா எதிர்கொண்டது. விறுவிறுப்பான ஆட்டத்தில் இரு அணி வீரர்களும் வெற்றிக்காக போராடினர். முதல் பாதியில் பின்தங்கிய இந்தியா, இரண்டாவது பாதியில் அபாரமாக விளையாடி 40-க்கு 34 என்ற புள்ளிக்கணக்கில் வெற்றி பெற்று தங்கப் பதக்கத்தை கைப்பற்றியது. ஆசிய விளையாட்டு கபடி போட்டியில் இந்திய ஆடவர் மற்றும் மகளிர் அணி தங்கப் பதக்கம் வென்று சாதனை படைத்துள்ளன.
ஆசிய விளையாட்டு தொடரின் மகளிர் ஓட்ட பந்தயத்தில் இந்தியா வெண்கலப் பதக்கம் வென்றுள்ளது. ஜப்பானில் நடந்து வரும் இந்த தொடரில், மகளிர் 400 மீட்டர் ஓட்டப்பந்தயத்தில், 53.21 வினாடிகளில் இலக்கை கடந்து இந்தியாவைச் சேர்ந்த Prachi வெண்கலப்பதக்கம் வென்றார். இதன் மூலம் இந்தியாவுக்கு 14 வெண்கல பதக்கங்கள் கிடைத்துள்ளன.
ஆசிய விளையாட்டு தொடரின் ஆடவர் குண்டு எறிதலில் இந்தியா வெள்ளிப்பதக்கம் வென்றது. ஆடவர் குண்டு எறிதலில் 20.64 மீட்டர் தூரம் வரை குண்டு எறிந்து இந்தியாவின் தஜிந்தர் பால் சிங் வெள்ளிப்பதக்கம் வென்றுள்ளார். ஈரான் வீரரிடம் நூலிழையில் தங்கப்பதக்கத்தை தவறவிட்டார். தஜிந்தர் பால் சிங் கடந்த 2018 மற்றும் 2022ம் ஆண்டுகளில் ஆசிய போட்டியின் குண்டு எறிதலில் தங்கம் வென்றார் என்பது குறிப்பிடத்தக்கது.
பதக்கம் வென்ற இந்திய வீரர்களான தஜிந்தர் பால் சிங், ப்ராச்சிக்கு குடியரசுத் தலைவர் திரௌபதி முர்மு மற்றும் பிரதமர் மோடி வாழ்த்து தெரிவித்துள்ளனர். மேலும் பல இலக்குகளை அடைய வேண்டும் என இருவரும் எக்ஸ் தளத்தில் வாழ்த்து தெரிவித்து பதிவிட்டுள்ளனர்.
