புதுச்சேரியில் மார்டின் அறக்கட்டளை சார்பில் முதன்முறையாக தொடங்கப்பட்டுள்ள இலவச UPSC பயிற்சி மையத்தை, துணைநிலை ஆளுநர் கைலாஷ்நாதன் குத்துவிளக்கேற்றி தொடங்கி வைத்தார்.
லட்சிய ஜனநாயகக் கட்சி தலைவரும், காமராஜ் நகர் தொகுதி எம்எல்ஏ-வுமான ஜோஸ் சார்லஸ் மார்டின் ஏற்பாட்டில், புதுவைத் தமிழ்ச்சங்கத்தில் இலவச UPSC பயிற்சி மையத்தின் தொடக்க விழா நடைபெற்றது.
நிகழ்ச்சியில் 100-க்கும் மேற்பட்ட மாணவ, மாணவிகள் பங்கேற்றனர். ஏழை, எளிய மாணவர்கள் UPSC பயிற்சிக்காக அதிக செலவு செய்ய வேண்டிய நிலையை தவிர்க்கும் வகையில், இந்த மையம் தொடங்கப்பட்டுள்ளதாக ஜோஸ் சார்லஸ் மார்டின் தெரிவித்தார்.
தொடர்ந்து பேசிய துணைநிலை ஆளுநர் கைலாஷ்நாதன், புதுச்சேரியில் இருந்து அதிகளவில் ஐஏஎஸ், ஐபிஎஸ் அதிகாரிகள் உருவாக வேண்டும் என்பதே தனது விருப்பம் என தெரிவித்தார். மேலும், இளைஞர்களுக்கு வேலைவாய்ப்பு வழங்குவது அரசுகளின் முன்னுரிமையாக இருக்க வேண்டும் என்றும், ஏழை, எளிய இளைஞர்களுக்காக இலவச UPSC பயிற்சி மையம் தொடங்கியதற்கு ஜோஸ் சார்லஸ் மார்டினுக்கு பாராட்டு தெரிவித்தார்.
