உக்ரைன் அதிபர் ஜெலென்ஸ்கியுடன் தொலைபேசி வாயிலாக உரையாடிய பிரதமர் மோடி, ரஷ்யா உடனான போரை நிறுத்துவதில் அனைத்து வழிகளிலும் பங்களிக்க தயாராக உள்ளதாக தெரிவித்துள்ளார்.
பிரதமர் நரேந்திர மோடி தனது எக்ஸ் பக்கத்தில் வெளியிட்டுள்ள பதிவில்,
உக்ரைன் அதிபர் ஜெலென்ஸ்கியுடன் ஆக்கப்பூர்வமான தொலைபேசி உரையாடலை மேற்கொண்டதில் மகிழ்ச்சி அடைவதாகத் தெரிவித்துள்ளார்.
இந்தியா – உக்ரைன் இடையிலான விரிவான இருதரப்பு ஒத்துழைப்பு குறித்து ஆய்வு செய்ததுடன், இரு நாடுகளுக்கும் இடையிலான உறவுகளை மேலும் வலுப்படுத்த ஒப்புக்கொண்டதாக குறிப்பிட்டுள்ளார்.
ரஷ்யாவுடன் நீடிக்கும் மோதல் மற்றும் அமைதியை மீட்டெடுப்பதற்காக மேற்கொள்ளப்படும் முயற்சிகள் குறித்த தனது கருத்துகளைப் பகிர்ந்து கொண்டதற்காக ஜெலென்ஸ்கிக்கு தனது நன்றியைத் தெரிவித்துக் கொண்டதாக கூறியுள்ளார்.
இந்த மோதலுக்கு அமைதியான முறையில் தீர்வு காண தன்னால் இயன்ற அனைத்து வழிகளிலும் பங்களிக்க இந்தியா உறுதிபூண்டுள்ளது என்பதை மீண்டும் வலியுறுத்தியதாக பிரதமர் மோடி குறிப்பிட்டுள்ளார்.
இதேபோல், ரஷ்ய வெளியுறவு அமைச்சர் செர்ஜி லாவ்ரோவுடன், மத்திய வெளியுறவுத்துறை அமைச்சர் ஜெய்சங்கர், தொலைபேசியில் உரையாடினார். அப்போது, உக்ரைன் உடனான மோதல் மற்றும் ராஜதந்திர முயற்சிகள் குறித்து இருவரும் ஆலோசித்ததாக எக்ஸ் பக்கத்தில் ஜெய்சங்கர் பதிவிட்டுள்ளார்.
