சிவகங்கை பேருந்து நிலையத்திலிருந்து சென்னைக்குச் செல்ல 20-க்கும் மேற்பட்ட தனியார் பேருந்துகள் இயக்கப்பட்டதுடன், அரசு சார்பிலும் சிறப்புப் பேருந்துகள் இயக்கப்பட்டன. இருப்பினும், பேருந்துகளில் பயணிக்க போதிய பயணிகள் இல்லாததால் பேருந்து நிலையம் பயணிகள் கூட்டமின்றி வெறிச்சோடி காணப்பட்டது.
நாடு முழுவதும் நேற்று தீபாவளி பண்டிகை உற்சாகமாகக் கொண்டாடப்பட்ட நிலையில், சென்னையில் தங்கி வேலை பார்த்து வரும் தென் மாவட்டங்களைச் சேர்ந்த ஏராளமானோர் பண்டிகையைக் கொண்டாடுவதற்காக தங்களது சொந்த ஊர்களுக்குச் சென்றிருந்தனர்.
தீபாவளி விடுமுறை முடிந்து மீண்டும் சென்னை திரும்புவதால், தமிழகத்தின் பல்வேறு பகுதிகளில் பேருந்து நிலையங்களில் பயணிகள் கூட்டம் அலைமோதியது.
குறிப்பாக மதுரை, கோயம்புத்தூர், திருப்பூர் உள்ளிட்ட முக்கிய நகரங்களில் இருந்து சென்னை செல்வதற்காக ஏராளமானோர் பேருந்து நிலையங்களில் குவிந்தனர். . இதனால் அரசு மற்றும் தனியார் பேருந்துகளில் பயணிகள் கூட்டம் அதிகரித்தது.
ஆனால், சிவகங்கை பேருந்து நிலையத்தில் மட்டும் இதற்கு முற்றிலும் மாறுபட்ட சூழல் நிலவியது. . சென்னைக்குச் செல்ல 20-க்கும் மேற்பட்ட தனியார் பேருந்துகள் இயக்கப்படுவதுடன், அரசு சார்பிலும் சிறப்புப் பேருந்துகள் இயக்கப்பட்டு வருகின்றன.
இருப்பினும், பேருந்துகளில் பயணிக்க போதிய பயணிகள் இல்லாததால் பேருந்து நிலையம் பயணிகள் கூட்டமின்றி வெறிச்சோடி காணப்பட்டது.
பொதுவாக தீபாவளி, பொங்கல் உள்ளிட்ட பண்டிகைக் காலங்களில் சென்னைக்குச் செல்லும் தனியார் பேருந்துகளில் பயணக் கட்டணம் ரூ.1,500 முதல் ரூ.2,500 வரை வசூலிக்கப்படுவது வழக்கம்.
ஆனால், தற்போது சாதாரண கட்டணமாக சுமார் ரூ.900 மட்டுமே வசூலிக்கப்படும் நிலையிலும், பேருந்துகளில் பயணிக்க மக்கள் ஆர்வம் காட்டாதது தனியார் பேருந்து நடத்துநர்களிடையே ஏமாற்றத்தை ஏற்படுத்தியுள்ளது.
மற்ற மாவட்டங்களில் தீபாவளி முடிந்து சென்னை திரும்பும் பயணிகளால் பேருந்து நிலையங்கள் பரபரப்பாகக் காணப்படும் நிலையில், சிவகங்கையில் மட்டும் பயணிகள் வருகை குறைந்து பேருந்துகள் காத்திருக்கும் நிலை ஏற்பட்டுள்ளது.
இதேபோல் மதுரை மாட்டுத்தாவணி பேருந்து நிலையத்திலிருந்து சென்னைக்கு தனியார் ஒப்பந்த பேருந்துகளை இயக்கியதால், அரசு பேருந்துகளில் செல்ல பயணிகள் ஆர்வம் காட்டவில்லை.
இதனால், அரசு பேருந்துகள், பயணிகள் இல்லாமல் பலமணி நேரம் காத்துக் கிடந்தன. பயணிகள் பெருமளவில் பயணிக்காததால் அரசுக்கு ஒரு பேருந்துக்கு 20 ஆயிரம் ரூபாய் வரை வருவாய் இழப்பு ஏற்படும் என ஓட்டுநர்கள் தெரிவித்தனர்.
